पुणे : स्व. कमलाबाई रसिकलाल धारिवाल पुरस्कृत छंदश्री आंतरराष्ट्रीय दिवाळी अंक स्पर्धा पुरस्कारात यंदा लोकमतच्या ‘दीपोत्सव' दिवाळी अंकाला उत्कृष्ट मुखपृष्ठासाठी पुरस्कार जाहीर करण्यात आला आहे. दिनमार्क पब्लिकेशनचे दिनकर शिलेदार यांनी गुरुवारी पत्रकार परिषदेत ही घोषणा केली. यावेळी लेखक डॉ. माधव राजगुरू उपस्थित होते.
मंगळवारी (दि.१) सकाळी ११ वाजता बालगंधर्व रंगमंदिराच्या कलादालनात माजी संमेलनाध्यक्ष व संत साहित्याचे अभ्यासक डॉ. सदानंद मोरे यांच्या हस्ते, धारिवाल इंडस्ट्रीजचे व्यवस्थापकीय संचालक प्रकाशशेठ धारिवाल यांच्या उपस्थितीत दिवाळी, ख्रिसमस आणि रमजान अंकाच्या प्रदर्शनाचे उद्घाटन होणार आहे.
सायंकाळी पाच वाजता गणेश सभागृहात अभिनेत्री डॉ. निशिगंधा वाड, अखिल भारतीय मराठी साहित्य महामंडळाचे अध्यक्ष मिलिंद जोशी, ज्येष्ठ लेखिका डॉ. सिसिलिया कार्व्हालो, संमेलनाचे माजी अध्यक्ष भारत सासणे यांच्या उपस्थितीत हा पुरस्कार वितरण सोहळा होणार आहे. पुरस्काराचे यंदाचे पाचवे वर्ष आहे.
‘ही स्पर्धा दिवाळी अंकांसाठी आंतरराष्ट्रीय स्तरावर घेण्यात येते. यंदा ख्रिसमसच्या निमित्ताने वसई येथून प्रकाशित होत असलेल्या अंकांच्या प्रवेशिका, तसेच रमजान सणानिमित्त प्रकाशित होणारा 'नब्ज्' हा अंक स्पर्धेसाठी स्वीकारण्यात आला.
देशभरातून प्रकाशित होणाऱ्या दिवाळी अंकांची माहिती पुणेकरांना व्हावी, यासाठी या अंकांचे प्रदर्शन भरविण्यात येत आहे. यंदा स्पर्धेमध्ये २३४ प्रवेशिका स्वीकारण्यात आल्या आहेत. अमेरिकेतून दोन दिवाळी अंक स्पर्धेत सहभागी झाले आहेत.
'दीपोत्सव'चा सन्मान
यंदाच्या उत्कृष्ट मुखपृष्ठाचा मान लोकमत समूहाच्या 'दीपोत्सव' दिवाळी अंकाला मिळाला आहे. हे मुखपृष्ठ सुप्रसिद्ध चित्रकार चंद्रमोहन कुलकर्णी यांनी साकारले आहे.
‘खुर्ची- सत्तेपासून सेक्सपर्यंत हा विषय असलेल्या 'दीपोत्सव'च्या संपादक अपर्णा वेलणकर असून, यामध्ये सामाजिक राजकीय आणि कौटुंबिक अशा व्यापक संदर्भात 'खुर्ची'चे महत्त्व अधोरेखित केले आहे.