ट्रकच्या धडकेत एक जागीच ठार

खेड पोलिसांनी दिलेल्या माहितीनुसार पुणे बाजूकडून नाशिक बाजूकडे भरधाव वेगाने जात असताना चांडोली फाटा येथे ट्रकचालकाचा ताबा सुटल्याने रस्त्यावरील टेम्पो, कारला एका बाजूने धडक दिली. तसेच दुचाकीला पाठीमागच्या बाजूने जोरदार धडक दिली. या धडकेत दुचाकी ट्रकने ५० फुटांपर्यंत फरफटत नेली. अक्षय मुकणे यांच्या डोक्यावरून ट्रकचे चाक गेल्याने जागीच मृत्यू झाला. वसंत वाघ( रा. चांडोली, ता. खेड) हा या अपघातात गंभीर जखमी झाला आहे. घटनास्थळी पोलीस हवालदार स्वप्निल गाढवे, सचिन जतकर, निखिल गिरीगोसावी, शेखर भोईर यांनी धाव घेऊन जखमीला तत्काळ रुग्णालयात पाठवून अपघातग्रस्त ट्रकखाली अडकलेली दुचाकी क्रेनच्या सह्याने ट्रक उचलून दुचाकी बाहेर काढली. मयत अक्षय मुकणे व जखमी वसंत वाघ हे चांडोली येथे वीटभट्टीवर कामास होते. काम उरकल्यानंतर ते राजगुरूनगरकडे येत होते. अपघात झाल्यानंतर पुणे-नाशिक महामार्गवर दोन्ही बाजूने १ किलोमीटर अंतरावर वाहनांच्या रांगा लागल्या होत्या.