पुणे - आई-वडीलांसह घरामध्ये झोपलेल्या अडीच वर्षांच्या चिमुरडीचे झोपेतच अपहरण केल्यावर बलात्कार करुन तिचा गळा आवळून निर्घूण खून करण्यात आल्याची घटना रविवारी मध्यरात्री साडेबारा ते सकाळी साडेसहाच्या दरम्यान धायरीमध्ये घडली. सकाळी तिचा मृतदेह आढळून आल्यानंतर घटना उघडकीस आली. या घटनेमुळे पोलिसही सुन्न झाले असून, जवळपास वीस ते २५ जणांकडे रात्री उशिरापर्यंत कसून चौकशी सुरु होती. श्रृती विजय शिवगणे (वय अडीच वर्षे) असे खून झालेल्या मुलीचे नाव आहे. याप्रकरणी वडील विजय शिवराज शिवगणे (वय ३२, रा. लगडमळा, वडगाव धायरी) यांनी फिर्याद दिली आहे. पोलिसांनी अज्ञात आरोपीविरुद्ध गुन्हा दाखल केला आहे. पोलिसांनी दिलेल्या माहितीनुसार, विजय शिवगणे हे मुळचे परभणी जिल्ह्यातील रहीवासी आहेत. दोन महिन्यांपुर्वी पोटाची खळगी भरण्यासाठी ते पुण्यात आले होते. सध्या ते सिंहगड रस्त्यावरील वडगाव धायरीजवळ राहात होते. विजय हे जवळच असलेल्या समृद्धी हॉटेलमध्ये वेटर म्हणून काम करतात. तर, आई विद्या जवळच्याच मंडईमध्ये भाज्या पॅकिंग करुन विकण्याचे काम करतात. दिवाळीनिमित्त शनिवारी त्यांच्याकडे श्रृतीचा मामा एक दिवसासाठी राहण्यास आला होता. रात्री सव्वाअकरापर्यंत सर्वजण गप्पा मारत बसलेले होते. साडे दहाच्या सुमारास विजय झोपले. त्यानंतर सव्वाअकराच्या सुमारास विद्या आणि श्रृती झोपल्या. त्यांच्या घराला लोखंडी आणि लाकडी असे दोन दरवाजे आहेत. लोखंडी दरवाजा फटीमधून हात घालून उघडता येतो. तर लाकडी दरवाजा खिडकीमधून हात घालून उघडता येतो. घरामधील सर्वजण झोपल्यानंतर हा दरवाजा उघडून घरामध्ये घुसलेल्या अज्ञात आरोपीने श्रृतीला उचलून नेले. रात्री बारा-सव्वाबाराच्या सुमारास विद्या यांना जाग आली तेव्हा श्रृती त्यांच्याजवळ नव्हती. त्यांनी पती विजय यांना उठवले. त्यांनी घरामध्ये तसेच आसपासच्या परिसरात बरीच शोधाशोध केली. मात्र, श्रृती मिळून आली नाही. या दोघांनी तातडीने पोलीस नियंत्रण कक्षाला दुरध्वनी करुन श्रृती हरवल्याची माहिती दिली. घटनास्थळी तातडीने लगडमळ्यामध्ये दाखल झालेल्या ६० पोलीस अधिकारी आणि कर्मचा-यांनी तिचा शोध सुरु केला. रात्रभर तिचा शोध सुरु होता. दरम्यान, अज्ञात आरोपीविरुद्ध अपहरणाचा गुन्हा दाखल करण्यात आला. याभागातील ऊसाचे शेत, गवत उगवलेला भाग असल्याने त्यामध्येही शोध सुरु होता. पहाटे साडेसहाच्या सुमारास उजाडल्यावर काही ठिकाणी रक्ताचे डाग दिसून आले. पोलिसांनी आसपास शोध घेतला असता तिचे कपडे मिळाले. तेथून काही अंतरावरच श्रृतीचा मृतदेह आढळून आला. तिच्या गळ्याभोवती फास दिल्याचे ब्रण होते. आरोपीने गळा आवळून तिचा खून केल्याचे प्राथमिक तपासात निष्पन्न झाले आहे. तिच्या आई-वडीलांनी व्यक्त केलेल्या संशयावरुन काही जणांना तात्काळ ताब्यात घेऊन चौकशीला सुरुवात करण्यात आली आहे. यासोबतच आसपासच्या भागात काम करणारे जवळपास २५ जण चौकशीसाठी ताब्यात घेण्यात आले आहेत. डॉ. निलम गो-हे यांनी केले कुटुंबीयांचे सांत्वन
अल्पवयीन मुलीचे अपहरण केल्यानंतर तिच्यावर लैंगिक अत्याचार करुन खून करण्यात आल्याच्या घटनेची माहिती मिळताच आमदार डॉ. निलम गो-हे यांनी ससून रुग्णालयात जाऊन मुलीच्या नातेवाईकांची भेट घेतली. यासोबतच पोलीस अधिकारी आणि डॉक्टर्सची भेट घेतली. पोलिसांना तपास जलदगतीने लावण्यासंदर्भात विनंती केली. या मुलीच्या कुटुंबीयांवर ओढवलेला प्रसंग अत्यंत दुदैर्वी असून तिच्या शवविच्छेदन अहवालावर पुढील गोष्टी अवलंबून असल्याने हा अहवाल विशेष काळजीपूर्वक तयार करण्यात यावा अशी अपेक्षा त्यांनी व्यक्त केली. शहरी भागात बीट स्तरावर महिला दक्षता व नागरिक सुरक्षा दले स्थापन करणे अत्यावश्यक आहे. या दलांच्या मदतीने दुर्गम व निर्जन भागात अधिकाधिक लक्ष देण्याची आवश्यकता आहे. तपासासंदर्भात अतिरिक्त पोलीस आयुक्त रविंद्र सेनगावकर आणि पोलीस उपायुक्त डॉ. प्रवीण मुंढे यांच्याशीही त्यांनी चर्चा केली.