लोकमत न्यूज नेटवर्क
पुणे : ‘सोन्या म्हणायचे नाही, मी इथला भाई आहे, भाई म्हणून बोलायचे’ असे सांगूनही भाई म्हणण्यास नकार दिल्याने टोळक्याने पती-पत्नीला मारहाण केली. साडेसतरा नळी येथे १५ एप्रिल रोजी रात्री १० वाजता ही घटना घडली.
हडपसर पोलिसांनी सोन्या जगताप, जालिंदर खलसे, शुभम साखुरे, करण दहीवडे, शाहरुख, उंदऱ्या, सोन्या जगतापचे मित्र अशी गुन्हा दाखल केलेल्यांची नावे आहेत.
याप्रकरणी आनंदा मारुती काळे (वय २५, रा. साडेसतरा नळी, हडपसर) यांनी फिर्याद दिली आहे. काळे हे आपल्या दुचाकीवरून जात असताना त्यांच्या बुलेटचा आवाज वाढवल्याने सोन्या जगताप याने त्यांना ‘ए आवाज कोणाला काढला रे’ असे विचारले. तेव्हा फिर्यादी यांनी ‘ए सोन्या तुला नाही केला’ असे म्हणाले. त्यावर आरोपींपैकी एकाने ‘त्याला सोन्या म्हणायचे नाही...तर भाई म्हणायचे,’ असे सांगितले. त्याला फिर्यादी यांनी ‘मी त्याला सोन्याच बोलणार, भाई तुझ्या घरी’ असे उत्तर दिले. त्यावर राग येऊन सोन्या जगताप व इतरांनी आनंदा काळे याला लाथाबुक्क्यांनी मारहाण करून बेल्टने मारले. सोडविण्यासाठी गेलेल्या त्यांची पत्नी व मावस सासू यांनाही मारहाण केली.