लोकमत न्यूज नेटवर्क
लोणी काळभोर : पेट्रोलपंपावर धाडसी दरोडा टाकून लूटमार करणारी आणि टूर्स-ट्रॅव्हल कारचालकाचा दृश्यम स्टाइल खून करणा-या कोयता गँगला जेरबंद करण्यात स्थानिक गुन्हे अन्वेषण विभागाच्या पथकाला यश आले आहे.
किरण भाऊसाहेब थिटे (वय २१, रा. केंदूर, ता. शिरूर, जि. पुणे), गौरव बाळू ढवळे (वय २१, रा. खोपवस्ती, अष्टापूर, ता. हवेली), संतोष गोरख ब्राम्हणे (वय २०, रा. शनिशिंगणापूर, ता. नेवासा, जि. अहमदनगर), भाऊसाहेब गौतम कुडुक (वय २२, रा. शेकटा, जिल्हा परिषद शाळेजवळ, ता. गेवराई, जि. बीड) व दक्षिणेस उर्फ दर्शन अनिल दांगट (वय २१, रा उंब्रज, दांगटपट, ता. जुन्नर) अशी अटक करण्यात आलेल्या दरोडेखोरांची नावे आहेत.
२८ डिसेंबरच्या मध्यरात्री २ ते ३ च्या सुमारास ५ दरोडेखोरांनी लोणी काळभोर ग्रामपंचायत हद्दीतील बोरकरमळा येथील पेट्रोलपंपावर धारधार कोयते आणि लाकडी दांडके घेऊन पंपावरील कामगारांना जिवे मारण्याची धमकी देऊन जबरी दरोडा टाकला होता. या दरोड्यात २ हजार ५०० रुपये रोख व ३७ हजार रुपये किमतीचे २ मोबाईल असा एकूण ३९ हजार ५०० रुपयांचा माल चोरून नेला होता. या गुन्ह्याचा तपास स्थानिक गुन्हे शाखेचे एक पथक तपास करीत होते. सीसीटीव्ही फुटेजवरून आरोपींचा पोलिसांनी माग काढला. आरोपी हे रांजणगाव गणपती येथील असल्याचे समजले. पोलिसांनी सापळा रचत रांजणगाव राजमुद्रा चौकात त्यांना अटक केली. त्यांची चौकशी केली असता, लोणी काळभोर येथील पेट्रोलपंपावर दरोडा टाकल्याची कबुली त्यांनी दिली. यासोबतच २ जाानेवारी रोजी रांजणगाव येथे या आरोपींनी फिरायला जाण्यासाठी रांजणगाव येथील टुरिस्टचा व्यवसाय करणारे चालक योगेश मच्छिंद्र गर्जे (वय २५, रा. रांजणगाव, ता. शिरूर, जि. पुणे ) यांची कार चोरण्याचा प्रयत्न केला. योगेश यांनी विरोध केल्याने त्याच्या तोंडावर कोयत्याने वार करून तसेच दगडाने ठेचून त्यांचा खून केला. पुरावा नष्ट करण्यासाठी योगेश यांचे प्रेत गाडीच्या डिकीत ठेवून गाडी भवरापूर (ता. हवेली) येथील मुळा - मुठा नदी वरील पुलावर आणून पुलावरून योगेश याचे प्रेत नदीत फेकून दिले. पुढील तपासासाठी त्यांना लोणी काळभोर पोलीस स्टेशन यांच्या ताब्यात दिले आहे.
स्थानिक गुन्हे अन्वेषण विभागाचे वरिष्ठ पोलीस निरीक्षक पद्माकर घनवट यांच्या मार्गदर्शनाखाली पोलीस उपनिरीक्षक शिवाजी ननावरे, सहायक फौजदार दत्तात्रय गिरमकर, पोलीस हवालदार उमाकांत कुंजीर, राजू मोमिन, जनार्दन शेळके, विजय कांचन, अजित भुजबळ, मंगेश थिगळे, धिरज जाधव, अक्षय नवले, समाधान नाईकनवरे यांनी ही कारवाई केली.