लोकमत न्यूज नेटवर्क
पुणे : शुक्रवारी सायंकाळी पाचपर्यंत शहरात कोरोनाची लागण झालेल्या व्यक्तींची संख्या ५ लाखांच्या वर गेली असून, आतापर्यंत ५ लाख ८० पुणेकरांना कोरोनाने गाठले आहे; पण यापैकी तब्बल ९७.८८ टक्के व्यक्तींनी कोरोनावर यशस्वीरीत्या मात केली असल्याचे मोठे समाधानकारक चित्र पुणे शहरात आहे.
शहरात आतापर्यंत ३३ लाख २२ हजार ७५३ जणांची कोरोना चाचणी करण्यात आली असून, यापैकी ५ लाख ८० जण कोरोनाबाधित आढळून आले आहेत. यापैकी केवळ ९ हजार १४ जणांचा मृत्यू झाला असला तरी, यातील बहुतांशी रुग्ण हे अन्य आजरानेही ग्रस्त होते. आतापर्यंत ४ लाख ८९ हजार ४८५ जण कोरोनामुक्त झाले आहेत. सध्या शहरातील सक्रिय रुग्णसंख्या १ हजार ५८१ इतकी आहे.
पुणे महापालिकेच्या आरोग्य विभागाने दिलेल्या माहितीनुसार, शुक्रवारी १२१ नवे कोरोनाबाधित आढळून आले आहे. आज विविध तपासणी केंद्रांवर ८ हजार ५०९ संशयितांची तपासणी करण्यात आली असून, तपासणीच्या तुलनेत कोरोनाबाधितांची टक्केवारी १.४२ इतकी आहे, तर आज दिवसभरात १७४ कोरोनामुक्त झाले आहेत, तर ५ जणांचा मृत्यू झाला असून, यापैकी २ जण हे पुण्याबाहेरील आहे. शहरातील आजचा मृत्यूदर हा १.८० टक्के इतका आहे़
शहरातील गंभीर रुग्णसंख्या ही १८३ इतकी असून, ऑक्सिजनसह उपचार घेणाऱ्यांची संख्या २४८ इतकी आहे. शहरात आजपर्यंत ९ हजार १४ जणांचा मृत्यू झाला आहे.
-----------------