शिरसगाव काटा येथे शिवजयंतीनिमित्त रक्तदान

कोल्हाटीबुवा ग्रामविकास प्रतिष्ठान हे सातत्याने विधायक उपक्रम राबवीत आहेत. या वर्षी शिवजयंती साधेपणाने साजरी करत प्रतिष्ठानने रक्तदान शिबिर भोसरी येथील रेड प्लस ब्लड बँक यांच्या संयुक्त विद्यमाने आयोजित केले होते. प्रारंभी छत्रपती शिवाजी महाराज यांच्या प्रतिमेचे पूजन करून अभिवादन करण्यात आले. यानंतर शिबिरास सुरुवात करण्यात आली. या शिबिरात शिरसगाव काटा व परिसरातील युवकांनी सहभाग घेत सुमारे ७७ पिशव्या रक्त संकलन करण्यात आले. रक्तदान करणाऱ्या रक्तदात्यांना प्रमाणपत्र व छत्रपती शिवाजी महाराज यांची मूर्ती भेट देण्यात आली. यावेळी अध्यक्ष राहुल कदम, जयदीप पवार, किरण काटे, गणेश शिंदे, प्रा. सचिन आवारे, प्रा. सचिन विधाते,मयूर जगताप, अनोज माने, सतीश केदारी यांनी शिबिर यशस्वी करण्यासाठी परिश्रम घेतले. या वेळी शिरसगाव काटा व पंचक्रोशीतील युवक, ग्रामस्थ आवर्जून उपस्थित होते.