लोकमत न्यूज नेटवर्क
मंचर: पत्नीवर वारंवार संशय घेत तिला कोयत्याने मारहाण करून जखमी केल्याप्रकरणी मंचरला एकाला अटक करण्यात आली आहे. या प्रकरणी त्याच्या पत्नीने तक्रार दिली आहे.
सचिन लक्ष्मण रोकडे (रा. देवगाव, ता. आंबेगाव) असे आरोपीचे नाव असून, त्याची पत्नी जयश्री रोकडे हिने मंचर पोलीस ठाण्यात तक्रार दिली आहे. सचिन रोकडे हा वारंवार जयश्री यांच्या चारित्र्यावर संशय घेऊन त्यांना मारहाण करायचा. यामुळे त्या गेल्या महिन्याभरापासून त्यांच्या माहेरी जाधववाडी (ता. पारनेर, जि. अहमदनगर येथे राहत आहेत. ११ जानेवारीला त्या वळती (ता. आंबेगाव) येथील काकांच्या घरी आल्या असताना सकाळी सातच्या सुमारास पती सचिन रोकडे हा काकांच्या घरी आला. त्याने त्यांची मुलगी धनश्री हिला जयश्री यांच्याकडे देत घरी चल असे म्हणाला. मात्र, त्या तयार नव्हत्या. यामुळे त्याने चाकू काढून सोबत चल नाही तर येथेच कापून टाकेल, अशी धमकी देत जबरदस्तीने गाडीत बसवले. त्यांना शिर्डी, शनिशिंगणापूर मुंबई येथे फिरविले. घरी देवगाव येथे परत आल्यावर दोन्ही मुलांना घरी पाठव, असे म्हणत तिच्या चारित्र्यावर संशय घेत मारहाण केली.
देवगाव फाटा येथील वन विभागाच्या झाडीत नेत कोयत्याने मारहाण केली. यात जयश्री या गंभीर जखमी झाल्या. त्यांनी कसेबसे त्यांच्या तावडीतून सुटका करत पळून घरी आल्या. घडलेला प्रकार फोनवरून दुसऱ्यांना सांगत पोलिसांत तक्रार दिली. पोलीस निरीक्षक सुधाकर कोरे यांच्या मार्गदर्शनाखाली सहायक पोलिस निरीक्षक सागर खबाले पुढील तपास करत आहे.