पुणे : मोटारसायकल अंगावर घातली म्हणून जाब विचारल्याने गुंडाच्या
टोळक्याने तरुणाच्या वाहनाची तोडफोड करून तलवार, कोयत्याने वार करून
त्याला जिवे मारण्याचा प्रयत्न केला.
याप्रकरणी स्वारगेट पोलिसांनी ६ जणांवर खुनाचा प्रयत्न केल्याचा गुन्हा
दाखल केला आहे.
याबाबत राम राजू उमाप (वय २५, रा. अण्णाभाऊ साठेनगर, अरण्येश्वर,
सहकारनगर) यांनी स्वारगेट पोलिसांकडे फिर्याद दिली आहे. त्यावरून
पोलिसांनी अक्रम शेख, अन्वर ऊर्फ जम्ब्या शेख, शाहरुख शेख, ओंकार पवार,
अमित शेकापूर, इमात शेख (सर्व रा. मीनाताई ठाकरे वसाहत, गुलटेकडी)
यांच्यावर गुन्हा दाखल केला आहे.
राम उमाप हे रविवारी आपल्या बहिणीकडे राखी बांधण्यासाठी चालले असताना
अन्वर शेखने उमाप यांच्या अंगावर मोटारसायकल घातली. फिर्यादी यांनी
त्याचा जाब विचारला असता आरोपीने शिवीगाळ करून जिवे मारण्याची धमकी दिली़.
त्यानंतर सोमवारी पहाटे ३ वाजता फिर्यादी यांच्या घराजवळ जाऊन गोंधळ
घालून त्यांच्या दुचाकीचा आरसा फोडून नुकसान केले. फिर्यादी हे सोमवारी दुपारी २ वाजता वडिलांच्या घरी जाताना गिरिधर भवन चौकात अक्रम शेख याने विनाकारण लाथ मारली़ त्याचा फिर्यादीने जाब विचारल्यावर सर्व जण टोळक्याने येऊन फिर्यादी यांच्या डोक्यात तलवारीने वार केला़ शाहरुख शेख याने त्याच्याकडील तलवार फिर्यादीचे मित्र गोविंद याच्या पोटात घुसवून त्यांना जखमी केले. अमित शेकापूर याने फिर्यादी यांना बांबूने मारहाण केली. आजूबाजूच्या लोकांनी मदतीला येऊ नये, म्हणून या टोळक्याने हातातील तलवारी, कोयते, पालघन व बांबू घेऊन परिसरात दहशत माजविली़. स्वारगेट पोलीस तपास करीत आहेत.