बेल्हा :
येथील संपूर्ण राज्यात प्रसिद्ध असणारा आठवडे बैलबाजारात बैलांची आवक दिवसेंदिवस घटत आहे. व्यापारांनी बाजाराकडे पाठ फिरवल्याने आवक घटली. तसेच जनावरांना मागणी कमी असल्याने उठावही मिळाला नाही.
पुणे जिल्ह्यात बेल्हा येथील आठवडे बैलबाजार प्रसिद्ध आहे. या बैलबाजारात शेतकरी व व्यापारी बैल खरेदी व विक्रीसाठी मोठ्या प्रमाणात येतात. या बाजाराबरोबरच म्हशींचाही मोठा बाजार भरतो. तसेच कडधान्य बाजार व तरकारी बाजारही मोठा भरतो. बीड, कल्याण, पंढरपूर, संगमनेर, आष्टी, लासलगाव, अहमदनगर आदी जिल्ह्यांतून व्यापारी व शेतकरी बैल खरेदी-विक्रीसाठी येतात. मात्र, गेल्या काही दिवसांपासून बाजारातील बैलांची आवक तसेच खरेदी-विक्रीत घट झाली. सोमवारी भरलेल्या बाजारात बैलाची आवक तुलनेने कमीच झालेली होती. तसेच खरेदी अगदी कमीच झाली. बैलांचे भावही कमी असले तरी खरेदीदारांचा प्रतिसाद मिळाला नाही. गेल्या काही महिन्यांपासून या बाजारात बैलांची आवकही कमीच होत आहे. बैलांना भावही मिळत नाहीत. तसेच मालाला उठावही होत नसल्याचे अनेक शेतकरी व व्यापाऱ्यांनी सांगितले. बैलगाडा शर्यती बंद झाल्यापासूनच या बाजारावर परिणाम झाला आहे. तसेच कोराेनाकाळातही बाजार तीन महिने बंद होता.
चौकट
आजच्या बाजारात खिल्लारी बैलजोडीचे भाव ५० ते ६० हजार रुपये, तर गावठी बैलजोडीचे भाव ४० ते ५० हजार रुपये होते. शेतकरीवर्ग आधुनिकीकरणाकडे वळला असून, शेतकरी वर्ग ट्रॅक्टरच्या साहाय्यानेच शेती करण्याकडे वळला असून शेतकरीवर्ग बैलबाजारात येत नाहीत. साखर कारखाने चालू झाले आहेत. तरीही बैलबाजारात खरेदीसाठी गर्दी नाही.
फोटो : बेल्हा येथील बाजारात जनावरांची झालेली आवक.