वडगाव कांदळी : पुणे-नाशिक महामार्गावर भरघाव वेगाने जाणाऱ्या मोटारीने दुचाकीला पाठीमागून जोरदार धडक दिल्याने दुचाकीवरील पती, पत्नी आणि मुलाचा जागीच मृत्यू झाल्याची घटना शुक्रवारी (दि १८) सायंकाळी सव्वापाचच्या सुमारास घडली.
राजेश निवृत्ती लेंडे (वय ३८), सुरेखा राजेश लेंडे (वय ३३), यश राजेश लेंडे (वय १२) अशी अपघातात मृत्यू झालेल्या एकाच कुटुंबातील तिघांची नावे आहेत. पोलिसांनी दिलेल्या माहितीनुसार पिंपळवंडी (ता. जुन्नर) येथील भटकळवाडी शिवारातील राजेश निवृत्ती लेंडे हे पत्नी सुरेखा व मुलगा यश यांना घेऊन नारायणगाव येथे कपडे खरेदी करण्यासाठी गेले होते. नारायणगावाहून कपडे खरेदी करुन ते परतत असताना जांबुत फाट्याजवळ येडगाव (ता. जुन्नर) गावच्या हद्दीत एका माॅलजवळ त्यांच्या मोटारसायकलला पाठीमागून येणाऱ्या मोटारीने जोरदार धडक दिली. हा अपघात एवढा भीषण होता. तिघांचाही जागीच मृत्यू झाला. धडक दिल्यानंतर मोटारही महामार्गावर दोन तीन पलट्या खाऊन उलटली. यात मोटारीचा चक्काचुर झाला. या घटनेत कारचालक किरकोळ जखमी झाला आहे. मात्र, एकाच कुटुंबातील तिघांचा मृत्यू झाल्याने पिंपळवंडी गावावर शोककळा पसरली आहे. या प्रकरणी कारचालकावर गुन्हा दाखल करण्यात आला आहे.
फोटो : अघातग्रस्त दुचाकी व मोटार कार