बारामती : कोरोनाच्या दुसऱ्या लाटेचा सामना करणाऱ्या बारामतीकरांवर आता कोविडनंतर उद्भणाऱ्या म्युकरमायकोसिसच्या (काळ्या बुरशी) आजाराच्या संसर्गाचे नवे संकट निर्माण झाले आहे. वर्षभरात या आजाराचे १७ रुग्ण आढळून आले आहेत.
कोरोना झाल्यानंतर उपचारानंतर बरा झालेल्या व्यक्तींना या आजाराचा धोका संभावतो. ज्या रुग्णांना इंजेक्शन टॉसिलीझुमॅब, रेमडेसिविर इंजेक्शन दिले आहे किंवा पाच दिवसांपेक्षा जास्त ऑक्सिजन दिला आहे, त्यांनाच नाकामध्ये म्युकरमायकोसिसची लागण झाली असल्याचे आढळून आले आहे. वेळीच निदान न झाल्यास अथवा उपचार न मिळाल्यास हा आजार बळावत जातो. यातून रुग्णाचा जबडा किंवा डोळा काढावा लागू शकतो. प्रसंगी प्राणही गमवावा लागू शकतो. बारामतीत या रुग्णांचे प्रमाण हजारी तीन ते चार आहे, असे मत वैद्यकीय तज्ज्ञांनी व्यक्त केले.
-------
अशी काळजी प्रथम घ्यावी
कोरोनाची लागण झाल्यानंतर तिसऱ्या व चौथ्या आठवड्यांमध्ये नाक नॉर्मल सलाइनने स्वच्छ करणे, रक्तातील साखरेचे प्रमाण १५ व्या व २२ व्या दिवशी तपासून पाहणे. म्युकरमायकोसिस आहे की नाही हे पाहण्याकरिता नाकातील स्वॅब तपासून घ्यावा.
--------
म्युकरमायकोसिस हा आजार दुर्मिळ असला तरी नवा नाही. वेळीच तपासणी व उपचार केल्यास केल्यास ब्लॅक फंगसचा हा आजार बरा होऊ शकतो. यासाठी रुग्णांनी लक्षणे दिसताच डोळ्यांचे डॉक्टर किंवा कान, नाक व घसा तज्ज्ञांच्या सल्ल्याने उपचार घ्यावे.
-डॉ. सदानंद काळे, वैद्यकीय अधीक्षक, उपजिल्हा रुग्णालय बारामती
--------
डोळे जळजळ करणे, डोळे लाल होणे, डोळे दुखणे अशी लक्षणे सुरुवातीच्या काळात आढळून येतात. मात्र, योग्य वेळी तपासणी व उपचार घेतल्यास हा आजार बरा होतो. अधिक संसर्गानंतर काही रुग्णांमध्ये डोळ्यांच्या खोबणीतून डोळा बाहेरही येतो. यात डोळा गमावण्याची शक्यता अधिक असते.
- डॉ. सचिन पांढरे, नेत्र विभागप्रमुख, उपजिल्हा रुग्णालय बारामती
-----
म्युकरमायकोसिस म्हणजे ही काळी बुरशी आहे, हा नवीन आजार नाही. मात्र, कोरोनानंतर रुग्णांमधील रोग प्रतिकारशक्ती कमी होत असल्याने या आजाराचा संसर्ग झपाट्याने होत असल्याचे समोर आले आहे. नाकातून किंवा तोंडातून हा बुरशीचा संसर्ग होतो. या संसर्गाकडे दुर्लक्ष केल्यास तोंड, डोळे, जबडा यातून पुढे मेंदूपर्यंत जाऊन तीव्र आघात करतो. त्यामुळे वेळेत तपासणी व उपचार करावे.
– डॉ. वैभव मदने, कान, नाक, घसा तज्ज्ञ
-----