पटणा – बिहार विधानसभा निवडणुकीचे निकाल आता स्पष्ट होऊ लागले आहेत, या एनडीएला बहुमत मिळताना दिसत आहे. पंतप्रधान नरेंद्र मोदींच्या नेतृत्वाखाली भाजपाला ७३ जागांची आघाडी आहे तर जेडीयूला ४९ जागांची आघाडी आहे तर राजद सध्या ६८ जागांवर आघाडी आणि काँग्रेसला अवघ्या २० जागांवर आघाडी मिळाल्याचं निवडणुकीच्या सुरुवातीच्या कलांवरून दिसत आहे. संपूर्ण मतमोजणीचा निकाल रात्री उशीरापर्यंत येईल अशी माहिती निवडणूक आयोगाने दिली आहे.
बिहार विधानसभा निवडणुकीत सुरुवातीच्या कलांमध्ये काँग्रेस-राजद आघाडीला मोठ्या प्रमाणात बहुमत मिळत असल्याचं दिसून आलं. परंतु हळूहळू एनडीएनेही मुसंडी मारली. सध्या एनडीए १३० पेक्षा जास्त जागांवर आघाडीवर आहे. या निवडणुकीत शिवसेनेने सत्ताधारी एनडीएविरोधात आक्रमक पवित्रा घेत उमेदवार उभे केले होते, पहिल्यांदा बिहारमध्ये शिवसेना ५० जागांवर लढणार असल्याचं जाहीर केले. परंतु शिवसेनेने २२ जागांवर उमेदवार उभे केले होते, मात्र यातील सर्व २२ जागांवर शिवसेनेला ‘नोटा’पेक्षाही कमी मतदान झालं आहे.
शिवसेनेच्या धनुष्यबाण चिन्हाला जेडीयूने आक्षेप घेतल्यानंतर निवडणूक आयोगाने शिवसेनेला धनुष्यबाण चिन्हावर निवडणुका लढवता येणार नाही असा आदेश दिला, त्यानंतर निवडणूक आयोगाने शिवसेनेला बिस्किट चिन्ह दिले, पण नापसंत पडल्याने शिवसेनेने दुसरं चिन्ह देण्याची मागणी केली, शिवसेनेची विनंती मान्य करत निवडणूक आयोगाने तुतारी वाजवणारं चिन्ह शिवसेनेला दिलं होतं. दुपारी ३ वाजेपर्यंत झालेल्या मतमोजणीत शिवसेनेच्या उमेदवारांना ‘नोटा’पेक्षा कमी मतदान झाल्याचं दिसून आलं.
शिवसेनेच्या उमेदवारांना झालेलं मतदान
पहिला टप्पा
मनीष कुमार – पालीगंज – १०७ मते
ब्युटी सिन्हा – गया शहर – १४५ मते
मृत्युंजय कुमार – वजीरगंज - ६८ मते
दुसरा टप्पा
संजय कुमार – चिरैय्या - मते ३०५
संजय कुमार झा – बेनीपूर – मते ७५४
रंजय कुमार सिंह – तरैय्या – मते ३७८
विनिता कुमारी – अस्थवां – १८० मते
रवींद्र कुमार – मनेर – १४१ मते
जयमाला देवी – राघोपुर – मते १२२
विनोद बैठा – भोरे – मते ६९६
शंकर महसेठ – मधुबनी – मते ३२२
तिसरा टप्पा
प्रदीप कुमार सिंह – औराई - मते ३३१
शत्रूघन पासवान – कल्याणपुर - मते १०३२
सुभाषचंद्र पासवान – बनमंखी – मते १३१
नवीन कुमार मल्लीक – ठाकूरगंज – मते ७०७
कुंदन कुमार – समस्तीपुर – मते ४६
पुष्पांकुमारी – सराय रंजन – मते २६९
मनीष कुमार – मोरवा – मते २१०
शिवनाथ मल्लीक – किशनगंज – मते २०१
चंदन कु. यादव – बहादुरगंज – मते ११६६
गुंजा देवी – नरपरगंज – मते १२५
नागेंद्र चंद्र मंडल – मनिहारी - मते ४९६
२०१५ मध्ये लढवल्या ८० जागा
सन २०१५ च्या बिहार विधानसभा निवडणुकीत शिवसेनेने २४३ जागांपैकी ८० जागा लढवल्या होत्या. त्यात शिवसेनेचा एकही उमेदवार निवडणूक आला नाही. मात्र, शिवसेनेला एकूण 2 लाख 11 हजार 131 मते मिळाली होती. त्यात हयाघाट, बोचहा, दिनारा जमालपूर, कुम्हरार, पटनासाहिब आणि मोरवा या सात विधानसभा मतदारसंघात शिवसेनेच्या उमेदवाराला तिसऱ्या क्रमांकाची मते मिळाली होती. विशेष म्हणजे एकूण ३५ जागांवर शिवसेनेला भाजपपेक्षाही अधिक मते मिळाली होती. मात्र यंदाच्या निवडणुकीत शिवसेनेलाही ‘नोटा’पेक्षाही अधिक मतदान झालं नाही.