शेतकऱ्यांनी योजनांचा लाभ घ्यावा

शेतकऱ्यांच्या हितासाठी सहकाराच्या माध्यमातून कार्य करणाऱ्या पुणे जिल्हा सहकारी बँकेच्या विविध योजनांचा शेतकऱ्यांनी लाभ घ्यावा.

लोणावळा : शेतकऱ्यांच्या हितासाठी सहकाराच्या माध्यमातून कार्य करणाऱ्या पुणे जिल्हा सहकारी बँकेच्या विविध योजनांचा शेतकऱ्यांनी लाभ घ्यावा. महिला बचत गटांनीही बँकेच्या माध्यमातून स्वावलंबी बनावे, असे आवाहन पुणे जिल्हा मध्यवर्ती बँकेचे संचालक बाळासाहेब नेवाळे यांनी केले.या वेळी मावळ तालुक्यातील पहिल्या सुसज्ज अशा वाकसई विविध कार्यकारी सोसायटीचे कार्यालयाचे उद्घाटन राष्ट्रवादीचे तालुकाध्यक्ष गणेश ढोेरे व नेवाळे यांच्या हस्ते करण्यात आले. त्यानिमित्त आयोजित वाकसई येथे आयोजित शेतकरी मेळाव्यात नेवाळे बोलत होते. सन १९५९मध्ये वाकसई, देवघर, करंडोली व जेवरेवाडी या गावांसाठी ही सोसायटी सुरू करण्यात आली . सोसायटीचे २६० सभासद आहेत. बियाणे, खते, जिल्हा बँकेच्या माध्यमातून कर्ज उपलब्ध करून, शेतकऱ्यांच्या अडचणी सोडवत हित जोपासण्याचे काम सोसायटी करीत असल्याचे नवनिर्वाचित अध्यक्ष लक्ष्मण शेलार यांनी सांगितले.ढोरे यांनी आगामी पंचायत समितीवर राष्ट्रवादीचा झेंडा फडकविण्यासाठी सर्वांनी कंबर कसून निष्ठेने काम करा, असे सांगितले. या वेळी परिसरातील कार्यकर्त्यांनी मोठ्या संख्येने राष्ट्रवादीत प्रवेश केला. मावळ तालुका राष्ट्रवादी विद्यार्थी काँग्रेसच्या वतीने गुणवंत विद्यार्थी व शिक्षकांचा सत्कार करण्यात आला.मेळाव्याला ओबीसी सेलचे जिल्हाध्यक्ष अर्जुन गरुड, नवनिर्वाचित उपाध्यक्ष मारुती देशमुख, तालुका युवकाध्यक्ष रमेश गायकवाड, विद्यार्थी अध्यक्ष अमोल केदारी, मावळ तालुका खरेदी विक्री संघाचे अध्यक्ष बाळासाहेब भानुसघरे, सोसायटीचे अध्यक्ष लक्ष्मण शेलार, सुभाष जाधव, मंगेशकाका ढोरे, हभप. काशिनाथ शेलार, संत तुकाराम झाड पादुका संस्थानचे अध्यक्ष भरत येवले, वाकसईचे सरपंच मनोज जगताप, बाळासाहेब येवले, मारुती येवले, किसन आहेर, दादा डफळ, गणपत विकारी, एकनाथ गायकवाड, राजू देवकर, तानाजी दाभाडे, शुभांगी राक्षे, मनीषा आंबेकर, संजय देवकर आदी उपस्थित होते. सूत्रसंचालन अमोल केदारी व सुरेश कडू यांनी केले. प्रास्ताविक सोसायटीचे सचिव गणपत भानुसघरे यांनी केले. (वार्ताहर)