पाथरी - गोदावरी नदीपात्रात मासे पकडण्यास गेलेल्या एक मच्छीमाराचा बुडून दुर्देवी मृत्यू झाल्याची घटना तालुक्यातील उमरा येथे आज दुपारी घडली. वैजनाथ दगडोबा बिजुले असे मृत मच्छीमाराचे नाव आहे.
पाथरी तालुक्यातील उमरा येथील वैजनाथ दगडोबा बिजुले ( ५५ ) वर्ष हे सोमवारी ( दि. ६ ) सायंकाळी ६ वाजेच्या सुमारास उमरा शिवारातील गोदावरी नदीच्या पात्रातील मासे पकडण्यासाठी गेले होते. रात्री ८ वाजेपर्यंत ते घरी परत न आल्याने नातेवाईकांनी गोदावरी नदीच्या काठावर त्यांचा शोध घेतला.
यावेळी बोट आणि चपू नदी किनारी दिसून आला. मात्र वैजनाथ बिजुले हे सापडले नाहीत. यानंतर गोदावरी नदीच्या काठावर शोध घेतला असता दोन दिवसानंतर सकाळी ११ वाजता त्यांचा मृतदेह पाण्यावर तरंगताना आढळून आला. माहिती मिळताच पोलिसांनी घटनास्थळी पंचनामा केला. याप्रकरणी सुदाम बिजुले यांच्या फिर्यादीवरून पाथरी पोलीस ठाण्यात अकस्मित मृत्यूची नोंद करण्यात आली आहे.