देवगावफाटा (परभणी) : सेलू शहरानजीक एका अज्ञात वाहनाच्या धडकेत दुचाकीवरील एकाचा मृत्यू झाला तर एकजण गंभीर जखमी झाला. ही अपघात मंगळवारी सायंकाळी ६. ३० वाजेच्या सुमारास झाला.
याबाबतची माहिती अशी की, बाबुराव श्यामराव कर्हाळे ( ३२ ) व अशोक नामदेव शिंदे ( ५५, दोघे.रा पार्डी ) हे दोघे मंगळवारी सायंकाळी ६:३० वाजेच्या सुमारास दुचाकीवरून (क्रं एम.एच.२१ बि.सी.६०५१ ) सेलू येथून वालूर मार्गाने पार्डी गावी जात होते. दरम्यान, सेलू शहरानजीक एका कंपनीचे काम सुरू असलेल्या ठिकाणी अज्ञात वाहनाने दुचाकीला जोरदार धडक दिली. यामध्ये बाबुराव व नामदेव शिंदे गंभीर जखमी झाले.
अपघाताची माहिती मिळताच नागरिकांनी गंभीर जखमी दोघांना तातडीने खाजगी रुग्णालयात दाखल केले. येथे डॉक्टरांनी तपासून बाबुराव यांना मृत घोषित केले. तर अशोक शिंदे यांना अधिक उपचारासाठी उपजिल्हा रुग्णालय सेलू येथे हलविण्यात आले. पोलीस कर्मचाऱ्यांनी पंचनामा केला आहे. या घटनेत दुचाकीचे मोठे नुकसान झाले आहे.