थंडीचा आनंद घेण्यासाठी आता महाबळेश्वर सोडा, परभणीला चला; तापमान थेट ६.६ अंशांवर!

परभणीने 'थंडीत' महाबळेश्वरला मागे टाकले! दोन दिवसांपासून जिल्ह्यात 'हुडहुडी' कायम

परभणी : जिल्ह्यात गेल्या दोन दिवसांपासून थंडीचा जोर प्रचंड वाढला असून पाऱ्याची घसरण चिंताजनक पातळीवर पोहोचली आहे. रविवारी नोंदवलेले ८ अंश सेल्सिअस तापमान सोमवारी सकाळी घटत थेट ६.६ अंशांवर स्थिरावले. हा पाऱ्याचा आकडा महाबळेश्वरच्या तापमानालाही मागे टाकणारा ठरला असून परभणीकर अक्षरशः गारठून गेले आहेत.

शहरात पहाटेपासून दाट धुके पसरत आहे. रस्ते, इमारती, वाहनांचे काच, झाडे–झुडपे पांढऱ्या धुक्याच्या चादरीत गुरफटल्यासारखे दिसत आहेत. सकाळी ७ नंतरही दृष्यमानता मर्यादित असल्याने वाहनधारकांना विशेष काळजीपूर्वक प्रवास करावा लागत आहे. पहाटे  थंडीपासून बचाव करणारे नागरिक मोठ्या प्रमाणात दिसत आहेत. थंडीच्या लाटेमुळे शहरातील दैनंदिन व्यवहारांवरही परिणाम जाणवतो आहे. बाजारपेठा उशिरा सुरू होत आहेत, तर सकाळच्या सत्रात चहाच्या टपऱ्या, गरम दूध विक्रेत्यांपाशी मोठी उलाढाल होताना दिसत आहे. सध्या नागरिक गरम कपडे, मफलर, शॉल, टोपी यांची खरेदी करण्याकडे मोठ्या प्रमाणात वळले आहेत.

दोन दिवसांपासून जिल्ह्यात 'हुडहुडी' कायमशनिवारपासूनच थंडीने जोर पकडला होता. त्यात रविवारी तापमान ८ अंशांवर आल्याने थंडीचा चटका वाढला. परंतु सोमवारी सकाळी ६.६ अंशांची नोंद झाल्याने थंडीची तीव्रता कमालीची वाढली. अचानक पडलेल्या गारठ्यामुळे लहान मुले, वृद्ध आणि आजारपण असलेले नागरिक अधिक त्रस्त झाले असून डॉक्टरांकडे रुग्णसंख्या वाढू लागली आहे.

रब्बी पिकांवर थंडीचा फटकागेल्या आठवडाभरापासून तापमानात सातत्याने चढ-उतार होत असल्याने रब्बी पिकांना मोठा फटका बसला आहे. गहू, हरभरा, ज्वारी यासारख्या पिकांवर थंडीचा प्रतिकूल परिणाम होत असल्याचे कृषी विभागाकडून सांगण्यात येत आहे. शुक्रवारपर्यंत ११.२ अंशांवर असलेला पारा अवघ्या दोन दिवसांत ५ अंशांनी खाली येणे ही चिंतेची बाब असल्याचे शेतकरी व्यक्त करतात.

परभणीचा पारा महाबळेश्वरलाही मागे टाकणारासामान्यतः महाबळेश्वर येथे डिसेंबर महिन्यात ७–८ अंश तापमानाची नोंद होते. मात्र सोमवारी परभणीचे तापमान ६.६ अंशांवर पोहोचल्याने नागरिकांमध्ये चर्चा रंगली. आता महाबळेश्वर सोडा, थंडीचा अनुभव घ्यायचा असेल तर परभणीला या, असे वातावरण निर्माण झाले आहे.

मागील सात दिवसांतील तापमानातील मोठे चढ-उतारदिवस    तापमान (अंश सेल्सिअस)सोमवार    ८.४मंगळवार    ९.८बुधवार    ९गुरुवार    ११शुक्रवार    ११.२शनिवार    ९रविवार    ८सोमवार    ६.६