मानवत ( परभणी ): तालुक्यातील रामेटाकळी शिवारात दुचाकी आणि कारची समोरासमोर जोरदार धडक होऊन एक जण ठार झाल्याची घटना सोमवारी रात्री ११.३० वाजेच्या सुमारास घडली. या अपघातात दुचाकीवरील दोन आणि कारमधील तीन अशी पाच जण जखमी आहेत. यातील तिघांची प्रकृती गंभीर आहे.
तालुक्यातील रामेटाकळी शिवारतील राज्य महामार्गावरून अमित विष्णू शेळके ( 18, रा वझुर खु) , विकास गौतम ढवळे (20, रा रामेटाकळी) आणि पप्पू भीमराव घोडके (20, रा मुदगल ता पाथरी ) हे तिघे जण एका विनाक्रमांक दुचाकीवरून पोंहडुळकडे जात होते. रात्री साडे अकरा वाजेच्या सुमारास रामेटाकळी शिवारात त्यांच्या दुचाकीचा परभणीकडे जाणाऱ्या एका कारसोबत ( क्रमांक एम एच 22 g j 6156) समोरासमोर धडक झाली.
या भीषण अपघातात दुचाकीवरील तिघे गंभीर जखमी झाले. तर कारमधील तिघे देखील जखमी झाले. या पैकी दुचाकीवरील अमित विष्णू शेळकेचा उपचारासाठी नेत असताना मृत्यू झाला. तर विकास गौतम ढवळे, पप्पू भीमराव घोडके हे गंभीर जखमी झाले आहेत. कारमधील तिघांची नावे समजू शकली नाहीत. घटनेची माहिती मिळताच स पो नि आंनद बनसोडे, उद्धव माने, शेख मुन्नू, नारायण सोळंके यांनी घटनास्थळी धाव घेत पुढील कारवाई केली.