सेलू : शहरातील एका बारच्या पाठीमागे मोकळ्या जागेत शुक्रवारी रात्री ८:३० वाजता गोलाकार बसून पैशावर पत्ते खेळणाऱ्या सात जणांना सेलू पोलीसांनी ताब्यात घेत रोख रक्कम व मोबाईल असा ३५ हजार ९० रूपयाचा मुद्देमाल जप्त केला. शुक्रवारी रात्री उशीरा सात आरोपीविरुद्ध गुन्हा दाखल केला आहे.
शहरातील एका बारच्या पाठीमागे मोकळ्या जागेत शुक्रवारी रात्री ८:३० वाजता गोलाकार बसून एकनाथ गायकवाड, मधुकर बुरे, विष्णू वाघ, नबाजी कांबळे, अनिल बर्डे,अनिल डंबाळे, दत्ता मानमोडे (सर्व रा. सेलू) हे गोलाकार बसून झन्ना- मन्ना नावाचा पत्ते जुगार खेळत होते. हा जुगार पैशावर खेळत असताना नगदी रुपये मोबाईल व पत्ते जुगाराचे साहित्य अशा ३५ हजार ९० रूपये मुद्देमालासह गस्तीवर असलेले सपोनि सुनिल अंधारे यांच्या पथकाला मिळून आले.याप्रकरणी रात्री उशीरा सेलू पोलीस ठाण्यात ७ जणांविरुद्ध गुन्हा दाखल करण्यात आल्याची माहिती पोलीस निरिक्षक रावसाहेब गाडेवाड यांनी दिली आहे.