गंगाखेडमध्ये २५ वर्षीय युवकावर धारदार शस्त्राने हल्ला

गंगाखेडमधील वर्दळीचा भाग असलेल्या साईनगर येथील डाॅक्टर लेन रस्त्यावर विशाल प्रकाश कदम (वय २५) या युवकाच्या मानेवर, कानावर धारदार शस्त्राने अज्ञात आरोपीने वार केला. हा प्रकार शनिवारी दुपारी १.३० च्या सुमारास घडला. गंभीर जखमी युवक विशाल प्रकाश कदम याला उपचारांसाठी तातडीने रुग्णवाहिकेने उपजिल्हा रुग्णालयात दाखल केले. मात्र, रक्तस्राव अधिक होत असल्याने प्राथमिक उपचार करून त्यास नातेवाइकांनी पुढील उपचारांसाठी नांदेड येथे हलविले. याबाबत माहिती मिळाल्यानंतर पोलीस निरीक्षक वसुंधरा बोरगावकर यांच्या पथकाने घटनास्थळी धाव घेऊन घटनेबाबत चौकशी सुरू केली. या प्रकरणी एकास संशयित म्हणून ताब्यात घेतले आहे. हल्ल्याचे कारण शनिवारी सायंकाळपर्यंत स्पष्ट झाले नव्हते. या घटनेची नोंद रात्री उशिरापर्यंत गंगाखेड पोलीस ठाण्यात झाली नव्हती. बाजारपेठ भागात दिवसा झालेल्या हल्ल्याच्या घटनेने शहरात भीतीचे वातावरण निर्माण झाले आहे.