लोकमत न्यूज नेटवर्क
परभणी : ओरिसा राज्यातून परभणीत विक्रीसाठी आणलेला २२ किलो ७५७ ग्रॅम गांजा पोलीस अधीक्षकांच्या विशेष पथकाने ११ फेब्रुवारी रोजी मध्यरात्री शहरातील बसस्थानक परिसरात जप्त केला आहे. या प्रकरणी ९ जणांविरुद्ध गुन्हा दाखल झाला असून, दोघांना पोलिसांनी ताब्यात घेतले आहे.
परभणी आणि जालना जिल्ह्यात विक्री करण्यासाठी काहींनी गांजा आणल्याची माहिती पोलीस अधीक्षकांच्या विशेष पथकाला मिळाली. त्यावरून पथकातील कर्मचाऱ्यांनी दिवसभर शोध मोहीम राबविली. गांजा घेऊन आलेेले काही जण बस स्थानक परिसरातील एका लॉजमध्ये थांबल्याची माहिती मिळाल्यानंतर त्या ठिकाणी जाऊन कारवाई करण्यात आली. यावेळी १ लाख १३ हजार ७८५ रुपये किमतीचा २२ किलो ७५७ ग्रॅम गांजा, एक दुचाकी, एक मोबाइल पोलिसांनी जप्त केला आहे. या प्रकरणात पोलिसांनी दोन आरोपींना ताब्यात घेतले आहे. हा गांजा ओरिसा राज्यातून परभणी आणि जालना जिल्ह्यात विक्री करण्यासाठी आणला असल्याची माहिती या आरोपींनी पोलिसांना दिली. दरम्यान, एन.डी.पी.एस. कायद्यानुसार ९ जणांविरुद्ध कोतवाली पोलीस ठाण्यात गुन्हा दाखल करण्यात आला आहे. पोलीस निरीक्षक कुंदनकुमार वाघमारे तपास करीत आहेत.
सहायक पोलीस अधीक्षक अविनाशकुमार, पोलीस उपअधीक्षक बापुराव दडस, उपनिरीक्षक चंद्रकांत पवार, विश्वास खोले, सुग्रीव केंद्रे, नीलेश भुजबळ, यशवंत वाघमारे, शंकर गायकवाड, अजहर पटेल, दीपक मुदीराज, विष्णू भिसे, अरुण कांबळे, आरेफ कुरेशी, गणेश कौटकर, कोतवाली पोलीस ठाण्याचे सहायक पोलीस निरीक्षक विवेकानंद पाटील, कर्मचारी राजेश आईटवाड, बालाजी लटपटे, रामा कदम यांनी ही कारवाई केली.