Wayne Rooney: नवरा बायकोच्या संसारात वाद होणं हे जोडप्यासाठी नवीन नाही. एखाद्या गोष्टीवरून नवरा बायकोमध्ये भांडणं किंवा छोट्या मोठ्या कुरबुरी होतातच. पण एका बायकोनं आपला १३ वर्षांचा संसार वाचवण्यासाठी आता थेट नवऱ्यालाच धमकी दिली आहे. घराबाहेर पाऊल ठेवायचं नाही, अशी तंबी देत नवऱ्याला नजरकैदेत ठेवण्याची पूर्ण तयारीच तिने केली आहे. हे प्रकरण आहे महान फुटबॉलर वॅन रूनी आणि त्याची पत्नी कॉलिन यांच्यामधलं.
रूनीला सध्या त्याच्या वैयक्तिक आयुष्यात काही अडचणींचा सामना करावा लागतो आहे. तशातच 'एकटा घराबाहेर पडायचं नाही' असं फर्मानच वॅन रूनीच्या पत्नीने काढलंय आणि २४ तास त्याच्यावर नजर ठेवली जात आहे. 'द सन'ने दिलेल्या वृत्तानुसार, ३६ वर्षीय रूनीवर २४ तास नजर ठेवण्याचा निर्णय त्याची पत्नी कॉलिन हिला घ्यावा लागला आहे. रूनीच्या मित्रांकडून मिळालेल्या माहितीनुसार १३ वर्षांचे वैवाहिक जीवन वाचवण्यासाठी पत्नीने हा उपाय शोधून काढला आहे. रूनी एकटा घराबाहेर पडू नये म्हणून पत्नी कॉलिन हिने आपला भाऊ किंवा इतर नातेवाईकांपैकी काहींना रूनीवर नजर ठेवायला सांगितली आहे.
रूनी आणि त्याची पत्नी कॉलिन यांना वैवाहिक जीवनात विविध गोष्टींचा सामना करावा लागतो आहे. रूनी सातत्याने अमली पदार्थांचे सेवन करत असतो आणि विवाहबाह्य संबंध ठेवत असल्याने त्याच्या पत्नीने आता कठोर पावलं उचलायला सुरूवात केली आहेत असं सांगितलं जातंय. एका रिपोर्टनुसार, त्या दोघांचं लग्न अनेकदा तुटण्यापर्यंत विषय ताणला गेला आहे. रूनीचं कायम दारू पिणं हेच संसारातील ताणतणावामागचं मुख्य कारण आहे. नशेच्या भरात त्याने असं काही केलं आहे की ज्यामुळे त्यांच्यात कडाक्याची भांडणं झाली आहेत.
वॅन रूनी अशाच काही कारणांमुळे आधीही चर्चेत आला होता. गेल्या वर्षी जुलै महिन्यात हॉटेल रूममध्ये त्याचे काही मुलींबरोबरचे फोटो व्हायरल झाले होते. २००४ साली रूनीचं सेक्स स्कँडलमध्येही नाव जोडलं गेलं होतं. मँचेस्टर युनायटेडकडून खेळताना एका २१ वर्षीय एस्कॉर्टशी शरीरसंबंध प्रस्थापित करण्यासाठी रूनी तिला १४० युरो द्यायचा असा खुलासा त्यावेळी झाला होता. आश्चर्याची गोष्ट म्हणजे यात आठवड्यात रूनीच्या जीवनावर आधारित बायोपिक रिलीज केला जाणार आहे. त्या चरित्रपटाचं बजेट तब्बल १ मिलियन असल्याचं सांगितलं जातंय.