नवी दिल्ली : रिओ आॅलिम्पिकसाठी भारतीय कुस्ती महासंघाने भारतीय आॅलिम्पिक संघटनेकडे पाठविलेल्या मल्लांच्या यादीतून सुशील कुमारचे नाव वगळल्याच्या वृत्ताचा कुस्ती महासंघाने इन्कार केला. दोन वेळा आॅलिम्पिक पदक जिंकणारा सुशील अद्याप रेस मध्ये कायम असल्याचा महासंघाने दावा केला आहे.आपल्या गटात आॅलिम्पिक पात्रता गाठणाऱ्या मल्लाचे नाव देशाच्या आॅलिम्पिक संघटनेकडे पाठविण्याची विश्वकुस्तीत परंपरा असल्याची स्पष्टोक्ती महासंघाने दिली. सुशीलचे नाव यादीत नाही त्यामुळे तो रिओला जाणार नाही, असे गृहित धरू नये. अध्यक्ष ब्रिजभूषणसिंग सरन हे चाचणी घ्यायची की नाही, याचा निर्णय घेतील. महासंघाचे सहायक सचिव विनोद तोमर म्हणाले, ‘संभाव्य मल्लांची यादी आम्ही नव्हे, तर विश्वकुस्ती महासंघाने पाठविली आहे. आपापल्या वजन गटात पात्र ठरलेल्या मल्लांची यादी पाठविण्याची परंपरा आहे.’७४ किलो फ्री स्टाइल प्रकारात आॅलिम्पिकमध्ये भारताचे प्रतिनिधित्व कोण करेल, याचे थेट उत्तर विनोद यांनी दिले नाही. ते म्हणाले, ‘यासाठी चाचणीचा निर्णय अद्याप व्हायचा आहे. सुशीलच्या जाण्याचा किंवा न जाण्याचा निर्णय झालेला नाही. ’नरसिंगने गतवर्षी लॉस वेगास येथे विश्व चॅम्पियनशिपमध्ये ७४ किलो वजन प्रकारात कांस्य जिंकून कोटा मिळविला होता. तेव्हापासून तो रिओसाठी दावा करीत आहे. माजी विश्व चॅम्पियन सुशीलने यासाठी चाचणी घेण्याची मागणी केली. सुशीलने ६६ किलो वजन प्रकारात बीजिंग आॅलिम्पिकमध्ये कांस्य आणि लंडन आॅलिम्पिकमध्ये रौप्य पदक जिंकले. विश्व महासंघाने वजन गटात बदल केल्यानंतर सुशील ७४ किलो गटात खेळेल. नरसिंग हा २०१२ च्या लंडन आॅलिम्पिकमध्ये ७४ किलो फ्री स्टाइल प्रकारात खेळला होता. (वृत्तसंस्था)
आॅलिम्पिक यादीत सुशील कायम
By admin | Updated: May 13, 2016 03:24 IST