अहमदाबाद : जबरदस्त अटीतटीच्या झालेल्या अंतिम सामन्यात बेंगाल वॉरियर्स संघाने झुंजार खेळाचे प्रदर्शन केले आणि पिछाडीवरुन बाजी मारत बलाढ्य दबंग दिल्लीला मात देत पहिल्यांदाच प्रो कबड्डी लीगचे जेतेपद पटकावले. स्पर्धेतील कामगिरी पाहता दिल्लीकडे संभाव्य विजेते पाहिले जात होते, मात्र बेंगालने शानदार खेळ करत ३९-३४ अशा गुणांनी बाजी मारली.
एका अरेना स्टेडियममध्ये झालेल्या या अंतिम सामन्यात सर्वांच्या नजरा दबंग दिल्ली संघाकडे लागल्या होत्या. यंदाच्या लीगमध्ये त्यांनी २२ पैकी १५ सामने जिंकून गुणतालिकेत निर्वावाद वर्चस्व लागले होते. दिल्लीकरांची यंदाची ‘दबंगगिरी’ पाहता जेतेपद त्यांचेच अशीच चर्चा रंगली होती. शिवाय अंतिम सामन्यातही दिल्लीकरांनी तुफानी सुरुवात करताना सहाव्याच मिनिटाला बेंगालवर लोण चढवून ११-४ अशी भक्कम आघाडी घेतली.