निहार म्हस्केची शानदार हॅट्ट्रिक

स्ट्राइकर निहार म्हस्के याने मोक्याच्या वेळी केलेल्या तीन गोलच्या जोरावर शेलार एफसी संघाने एकतर्फी विजय मिळवताना आय. सॉ. कोल्ट संघाचा ३-० असा फडशा पाडून बोरीवली

मुंबई : स्ट्राइकर निहार म्हस्के याने मोक्याच्या वेळी केलेल्या तीन गोलच्या जोरावर शेलार एफसी संघाने एकतर्फी विजय मिळवताना आय. सॉ. कोल्ट संघाचा ३-० असा फडशा पाडून बोरीवली प्रीमियर फुटबॉल लीग स्पर्धेत विजयी सलामी दिली. तसेच रुथलेस एफसी संघानेही दणदणीत विजय सलामी देताना कॅस्टल बॉइज एफसी संघाला २-० असे नमवले.बोरीवली स्पोटर््स फाउंडेशनच्या वतीने सेंट फ्रान्सीस डी’अ‍ॅसीस मैदानावर सुरू असलेल्या या स्पर्धेत शेलार संघाने आपल्या आक्रमक खेळाच्या जोरावर आयसी संघाला पुनरागमनाची एकही संधी दिली नाही. सामन्याच्या तिसऱ्याच मिनिटाला निहारने वेगवान गोल करत शेलार संघाला आघाडी मिळवून दिली. यानंतर २८ व्या मिनिटाला त्याने दुसरा गोल करत संघाची आघाडी मजबूत केली. या वेळी आयसी संघाकडून जोरदार प्रत्युत्तराची अपेक्षा होती. मात्र दडपणाखाली आल्यामुळे आयसी संघाकडून काही चुका झाल्या आणि त्याचा अचूक फायदा घेत पुन्हा एकदा निहारने गोल करून शानदार हॅट्ट्रिकसह संघाची आघाडी ३-० अशी भक्कम केली. या जोरावर मध्यांतराला शेलार संघाने एकहाती वर्चस्व राखले.दुसऱ्या डावात आयसी संघाने पुनरागमनाचा काहीसा प्रयत्न केला, परंतु त्यांना यश आले नाही. अखेर मजबूत बचावाच्या जोरावर आयसीच्या आक्रमकांना रोखताना शेलार संघाने सहज विजय मिळवला.अन्य सामन्यात रुथलेस एफसी संघाने सांघिक खेळाचे उत्कृष्ट प्रदर्शन करताना कॅस्टल बॉइज संघाचे आव्हान २-० असे परतावले. कीगान परेरा याने नवव्याच मिनिटाला गोल करून संघाला आघाडीवर नेल्यानंतर डेन परेरा याने ३७व्या मिनिटाला गोल करून संघाची आघाडी २-० अशी केली. ही आघाडी कायम राखत रुथलेसने बाजी मारली. (क्रीडा प्रतिनिधी)