मुंबई पुन्हा पराभूत

ड्वेन स्मिथ (६२) आणि ब्रँडन मॅक्युलम (४६) यांनी ४४ चेंडूंत १०९ धावांची धमाकेदार सलामी देताना शुक्रवारी चेन्नई सुपर किंग्सला मुंबई इंडियन्सविरुद्ध ६ विकेटनी विजयी केले.

रोहित नाईक - मुंबईड्वेन स्मिथ (६२) आणि ब्रँडन मॅक्युलम (४६) यांनी ४४ चेंडूंत १०९ धावांची धमाकेदार सलामी देताना शुक्रवारी चेन्नई सुपर किंग्सला मुंबई इंडियन्सविरुद्ध ६ विकेटनी विजयी केले. या दोघांच्या धडाक्यामुळे पहिल्या डावात केरॉन पोलार्डने केलेला हल्ला झाकोळला गेला. मुंबईने उभारलेल्या १८३ धावांचा पाठलाग करताना चेन्नईने २० चेंडू राखून सहज बाजी मारली. चेन्नईचा हा सलग तिसरा विजय असून, यजमान मुंबईला मात्र सलग चौथ्या पराभवाचे तोंड पाहावे लागले.स्मिथ आणि मॅक्युलम यांनी सुरुवातीपासून मुंबईकरांवर हल्ला चढवताना चेन्नईच्या विजयाचा पाया रचला. या दोघांनी ६ षटकांच्या पॉवर प्लेमध्येच तुफानी खेळी करून संघाच्या ९० धावा फलकावर लावल्या आणि येथेच चेन्नईचा विजय जवळजवळ स्पष्ट झाला. स्मिथ आपल्या ताकदवान फटक्यांनी मुंबईची गोलंदाजी फोडून काढत होता, तर दुसऱ्या बाजूलामॅक्युलम बेदरकारपणे मुंबईकरांना चोपत होता. अशा वेळी मुंबईच्या मदतीला धावून आला तो हरभजनसिंग. भज्जीने ८वे षटक टाकताना दुसऱ्या व चौथ्या चेंडूवर अनुक्रमे मॅक्युलम व स्मिथ या स्थिरावलेल्या फलंदाजांना बाद केले. या वेळी मुंबईचे काही प्रमाणात पुनरागमन करताना चेन्नईला रोखण्याचा प्रयत्न केला. स्मिथने ३० चेंडूंत ८ चौकार व ४ षटकार खेचताना आक्रमक ६२ धावा काढल्या. तर, मॅक्युलमने केवळ २० चेंडूंत ६ खणखणीत चौकारांसह २ षटकार मारून ४६ धावा कुटल्या. सुरेश रैना (नाबाद ४३) आणि फाफ डुप्लेसीस (११) यांनी चेन्नईचा धावफलक हलता ठेवण्याचा प्रयत्न केला. १३व्या षटकांत लसिथ मलिंगाने शानदार यॉर्करवर प्लेसीसचा त्रिफळा उडवून मुंबईला तिसरे यश मिळवून दिले. यानंतर कर्णधार महेंद्रसिंह धोनी (३)देखील पोलार्डच्या गोलंदाजीवर लगेच परतल्याने चेन्नईची अवस्था ४ बाद १६६ अशी झाली. मात्र, विजयाचे लक्ष्य आवाक्यात असल्याने चेन्नईला त्याचे फारसे दडपण नव्हते आणि दुसऱ्या बाजूला टिकून असलेल्या रैनाने अखेरपर्यंत किल्ला लढवीत चेन्नईला विजय मिळवून दिला. रैनाने २९ चेंडंूत ४ चौकार व २ षटकारांसह आपली खेळी सजवली.तत्पूर्वी, यंदाच्या आयपीएलमध्ये पहिल्या विजयाच्या शोधात शुक्रवारी वानखेडे मैदानावर चेन्नई सुपर किंग्सविरुद्ध उतरलेल्या मुंबई इंडियन्सची सुरुवात ‘नेहमीप्रमाणे’ अडखळतच झाली. मात्र, कर्णधार रोहित शर्मा (५०), केरॉन पोलार्ड (६४) आणि अंबाती रायुडू (२९) यांच्या जोरावर मुंबईने तगड्या चेन्नईसमोर ७ बाद १८३ धावा उभारल्या.नाणेफेक जिंकून मुंबईने फलंदाजी स्वीकारली. पहिल्याच षटकात आशिष नेहराने सलामीवीर पार्थिव पटेलला बाद करून मुंबईला झटका दिला. यानंतर धडाकेबाज कोरे अँडरसन आणि लेंडल सिमेन्सदेखील पाठोपाठ परतल्याने मुंबईची ३.४ षटकांत ३ बाद १२ अशी केविलवाणी अवस्था झाली. या वेळी हरभजनसिंगच्या आगमनाने संपूर्ण स्टेडियममध्ये जोश भरला. भज्जीने आक्रमक फटके खेळत आपला इरादा स्पष्ट केला. १०व्या षटकात मोहित शर्माने भज्जीला बाद केले. भज्जीने २१ चेंडंूत २ चौकार व एक षटकार खेचून २४ धावा फटकावल्या. यानंतर आक्रमणाची सर्व सूत्रे स्वीकारली ती पोलार्डने. सलग दुसऱ्या सामन्यात आक्रमक अर्धशतक झळकावताना पोलार्डने मुंबईला सावरले. त्याने शर्मासोबत पाचव्या विकेटसाठी ७५ धावांची भागीदारी रचली. नेहराने शर्माला बाद करून ही जोडी फोडली. शर्माने ३१ चेंडूत ५ चौकार व एक षटकार खेचताना ५० धावा केल्या.यानंतर अंबाती रायुडूने पोलार्डला उपयुक्त साथ देताना सहाव्या विकेटसाठी ४९ धावांची भागीदारी करून मुंबईला आव्हानात्मक मजल मारून दिली. रायडूने १६ चेंडूंत एक चौकार व ३ षटकार मारून २९ धावा काढल्या, तर पोलार्डने ३० चेंडूंत ६४ धावा कुटताना ४ चौकार व ५ षटकारांचा नजराणा पेश केला.