कोलंबो : श्रीलंकेचा वरिष्ठ फलंदाज कुमार संगकारा याने आंतरराष्ट्रीय क्रिकेटच्या एका कॅलेंडर वर्षात सर्वाधिक धावा बनविण्याचा विक्रम आपल्या नावे केला आहे़ त्याने आॅस्ट्रेलियाच्या रिकी पाँटिंगला मागे सारून हा नवा विक्रम प्रस्थापित केला आहे़ लंकेच्या या डावखुऱ्या फलंदाजाने इंग्लंडविरुद्धच्या सातव्या आणि अखेरच्या वन-डे सामन्यात सहावी धाव घेतली आणि एका वर्षात सर्वाधिक धावा करणाऱ्या खेळाडूंत अव्वल स्थान मिळविले़ आॅस्ट्रेलियाच्या पाँटिंगने २००५ मध्ये कसोटी, वन-डे आणि टी-२० सामन्यात एकूण २,८३३ धावा केल्या होत्या, तेव्हापासून एका वर्षात सर्वाधिक धावा करण्याचा विक्रम त्याच्याच नावे होता़ आता संगकारा याने यावर्षी कसोटी, वन-डे आणि टी-२० सामन्यांत एकूण २,८३४ धावा केल्या आहेत़ संगकाराने यावर्षी कसोटीत १,४८६ धावा केल्या आहेत, तर वन-डेमध्ये १,२५६ आणि टी-२० मध्ये ११९ धावा केल्या आहेत़ दरम्यान, संगकाराने पुढील वर्षी आॅस्ट्रेलिया आणि न्यूझीलंडमध्ये होणाऱ्या वन-डे वर्ल्डकपनंतर निवृत्तीची घोषणा केली आहे़ त्यामुळे इंग्लंडविरुद्ध मायदेशातील त्याचा अखेरचा सामना मानला जात आहे़ (वृत्तसंस्था)यावर्षी संगकाराव्यतिरिक्त त्याचा संघातील सहकारी एंजेलो मॅथ्युज याने यावर्षी आतापर्यंत २,५५१ धावा केल्या आहेत, तर त्यानंतर भारताचा स्टार फलंदाज विराट कोहली याचा क्रमांक लागतो़ त्याने वन-डे, कसोटी आणि टी-२० मध्ये एकूण २,०४३ धावा केल्या आहेत़ (वृत्तसंस्था)
संगकाराच्या वर्षात सर्वाधिक धावा
By admin | Updated: December 17, 2014 01:27 IST