लंका विजयी

लंकेची पाकवर मात, मालिकेत १-१ बरोबरी
पाल्लेकल: कुशल परेरा(६८)ची दणादण फटकेबाजी आणि दिनेश चांडीमलच्या नाबाद ४८ धावांच्या बळावर श्रीलंकेने बुधवारी पाकिस्तानचा दुसऱ्या वन डेत दोन गडी राखून पराभव करीत पाच वन डे सामन्यांच्या मालिकेत १-१ ने बरोबरी साधली.
पाकने निर्धारित ५० षटकांत ८ बाद २८७ धावा उभारल्या होत्या पण लंकेने तितकाच दमदार खेळ करीत ४८.१ षटकात ८ बाद २८८ धावा करीत सामना जिंकला. कुशल परेरान १३ चौकार आणि दोन षटकारांसह करिअरमधील जलद ६८ धावा केल्या. त्याला मोहम्मद इरफानने बाद केले. परेराने तिलकरत्ने दिलशानसोबत(४७) ८.१ षटकांच्या खेळात ९२ धावांची सलामी भागीदारी केली. दिलशानने तीन चौकारांसह ४७ धावा ठोकल्या. राहत अलीच्या वेगवान माऱ्यामुळे लंकेची स्थिती ५ बाद १५९ अशी होती पण चांडीमलने संयमित खेळी करीत विजयात मोलाची भूमिका बजावली. उपुल थरंगाने २८ आणि कर्णधार अँजेलो मॅथ्यूजने आठ तर तिरिमाने याने चार धावा केल्या. मिलिंदा श्रीवर्धन याने २८ चेंडूत २६ धावा केल्या. सचिर परिताना याने २८ चेंडूंवर चार चौकार आणि एका षटकारासह ३३ धावा ठोकल्या. तिसारा परेरा १५ व लसिथ मलिंगा दोन धावांवर नाबाद राहिले. राहत अलीने ९.१ षटकांत ७३ धावांत तीन, हफिजने दहा षटकांत ६१ धावांत दोन तर मोहम्मद इरफान व यासिर शाह यांनी एकेक गडी बाद केला.