कोहली-रहाणेची अर्धशतकी खेळी

कर्णधार विराट कोहली आणि अजिंक्य रहाणे यांनी वैयक्तिक अर्धशतके झळकावित मालिकेतील पहिली शतकी भागीदारी नोंदवली आणि भारताने दक्षिण आफ्रिकेविरुद्ध खेळल्या

नवी दिल्ली : कर्णधार विराट कोहली आणि अजिंक्य रहाणे यांनी वैयक्तिक अर्धशतके झळकावित मालिकेतील पहिली शतकी भागीदारी नोंदवली आणि भारताने दक्षिण आफ्रिकेविरुद्ध खेळल्या जात असलेल्या चौथ्या कसोटी सामन्यात शनिवारी तिसऱ्या दिवसअखेर दुसऱ्या डावात ४ बाद १९० धावांची मजल मारली. भारतीय संघाने एकूण ४०३ धावांची आघाडी घेत चौथ्या कसोटी सामन्यावर पकड अधिक मजबूत केली. अंधूक प्रकाशामुळे आज तिसऱ्या दिवसाचा खेळ निर्धारित वेळेच्या नऊ षटकांपूर्वी संपविण्यात आला. त्यावेळी कोहली (८३) व रहाणे (५२) खेळपट्टीवर होते. भारताची दुसऱ्या डावात ४ बाद ६७ अशी अवस्था असताना या जोडीने डाव सावरला. मालिकेत प्रथमच अर्धशतकी खेळी करणाऱ्या कोहलीने १५४ चेंडूंमध्ये १० चौकार ठोकले तर मालिकेतील एकमेव शतकवीर रहाणेने १५२ चेंडूंना सामोरे जाताना ५ चौकार मारले. भारताने आज कुर्मगती फलंदाजी करताना ८१ षटकांमध्ये १९० धावा फटकावल्या. पहिल्या सत्रात संघाने २६ षटकांत ५१ धावांच्या मोबदल्यात २ बळी गमावले तर दुसऱ्या सत्रात २८ षटकांमध्ये ६५ धावा वसूल करताना २ फलंदाजांचे मोल दिले. अखेरच्या सत्रात विकेट न गमाविता भारताने २७ षटकांमध्ये ७४ धावा फटकावल्या. मालिकेत विकेट न गमावलेले हे पहिले सत्र ठरले. भारताने पहिल्या डावात ३३४ धावा फटकावल्या आहे. प्रत्युत्तरात खेळताना दक्षिण आफ्रिकेचा डाव १२१ धावांत संपुष्टात आला. यजमान संघाने २१३ धावांची भक्कम आघाडी घेतली, पण टीम इंडियाने पाहुण्या संघाला फॉलोआॅन न देण्याचा निर्णय घेतला. मालिकेत २-० ने आघाडीवर असलेला भारतीय संघ कोटलावर विजयासह मालिका ३-० ने जिंकण्यास उत्सुक आहे. यात यशस्वी ठरला तर भारतीय संघ आयसीसी कसोटी क्रमवारीत दुसऱ्या स्थानावर झेप घेईल. भारताने मोहालीमध्ये पहिल्या कसोटी सामन्यात १०८ धावांनी तर नागपूरमध्ये तिसऱ्या कसोटी सामन्यात १२४ धावांनी विजय मिळवला आहे. आज दुसऱ्या डावात भारताची एकवेळ ४ बाद ५७ अशी अवस्था झाली होती. त्यानंतर कोहली व रहाणे यांनी सावध पवित्रा स्वीकारीत संघाचा डाव सावरला. कोहलीने काही अंशी आक्रमक खेळी केली तर रहाणेने कर्णधारासोबत स्ट्राईक रोटेट करण्यावर भर दिला. या दोघांनी ४८ व्या षटकात संघाला १०० चा पल्ला ओलांडून दिला. पहिल्या डावात मोठी आघाडी असल्यामुळे कोहली दडपण न बाळगता खेळला. चहापानानंतर डीन एल्गरच्या गोलंदाजीवर कव्हरमध्ये एक धाव वसूल करीत कोहलीने कारकिर्दीतील १२ तर मालिकेतील पहिले अर्धशतक पूर्ण केले. रहाणेने एबोटच्या गोलंदाजीवर २ धावा घेत कसोटी क्रिकेट कारकिर्दीतील आठवे अर्धशतक पूर्ण केले. कोहलीने दिवसाच्या ८१ व्या षटकात मोर्कलच्या गोलंदाजीवर चौकार ठोकत भारताची आघाडी ४०० धावांच्या पल्याड नेली, पण त्यानंतर अंधूक प्रकाशामुळे पंचांनी खेळ थांबवण्याचा निर्णय घेतला. त्याआधी, आज भारताची सुरुवात निराशाजनक झाली. मोर्कलने मुरली विजय (३) आणि रोहित शर्मा (००) यांना एकापाठोपाठ माघारी परतवत भारताची २ बाद ८ अशी अवस्था केली. त्यानंतर पुजारा व धवन यांनी सावधगिरी बाळगत संघाला २६ व्या षटकात अर्धशतक गाठून दिले. या दोघांनी ४५ धावांची भागीदारी केली. उपाहारानंतर पुजारा व धवन लवकरच माघारी परतले. लंचनंतरच्या तिसऱ्या षटकात मोर्कलच्या एका भेदक यॉर्करवर धवनचा (२१) त्रिफळा उडाला. पुजाराला (२८) इम्रान ताहिरने तंबूचा रस्ता दाखवला. दक्षिण आफ्रिकेतर्फे मोर्कलने १७ षटकांत २९ धावांच्या मोबदल्यात ३ बळी घेतले. (वृत्तसंस्था)धावफलकभारत पहिला डाव ३३४. दक्षिण आफ्रिका पहिला डाव १२१. भारत दुसरा डाव :- मुरली विजय झे. विलास गो. मोर्कल ०३, शिखर धवन त्रि. गो. मोर्कल २१, रोहित शर्मा त्रि.गो. मोर्कल ००, चेतेश्वर पुजारा त्रि. गो. ताहिर २८, विराट कोहली खेळत आहे ८३, अजिंक्य रहाणे खेळत आहे ५२. अवांतर (३). एकूण ८१ षटकांत ४ बाद १९०. बाद क्रम : १-४, २-८, ३-५३, ४-५७. गोलंदाजी : मोर्कल १७-६-२९-३, एबोट १७-६-३८-०, पीएट १८-१-५३-०, ताहिर २१-४-४९-१, एल्गर ८-१-१९-०.