नवी मुंबई : सारसोळे येथे महिला पोलीस कर्मचाऱ्याच्या घरी जबरी दरोड्याची घटना घडली. दरोडेखोरांनी केलेल्या हल्ल्यामधे पती-पत्नी जखमी झाले असून त्यांच्यावर रुग्णालयात उपचार सुरू आहेत.सारसोळे (नेरूळ) सेक्टर ६ येथे राहणाऱ्या विनंती रवींद्र पाटील (३१) यांच्या घरी दरोड्याची घटना घडली. विनंती 'ा नवी मुंबई पोलीस कर्मचारी असून त्या मुख्यालयात कार्यरत आहेत, तर त्यांचे पती रवींद्र पाटील हे महापालिकेचे कर्मचारी आहेत. सारसोळे गाव येथे काही दिवसांपूर्वीच ते राहायला आले होते. त्यानुसार वरच्या मजल्याचे बांधकाम सुरु असलेल्या इमारतीच्या तळमजल्यावर ते लहान मुलासह राहत होते. शुक्रवारी पहाटे साडेतीन वाजण्याच्या सुमारास एक चोर त्यांच्या घरात घुसला. स्वयंपाक खोलीची स्लायडिंग खिडकी उघडून त्याने घरात प्रवेश केला होता. मात्र घरात घुसलेला चोर अंधारामुळे घरातील भांड्यांना धडकला. त्यामुळे भांड्यांचा आवाज झाल्याने दोघाही पती-पत्नीला जाग आली. घरामधे कोण घुसले आहे हे पाहण्यासाठी दोघेही स्वयंपाक खोलीमधे गेले असता त्यांना समोरच एक चोर उभा असल्याचे दिसले. त्यांनी धाडसाने या चोराला पकडण्याचा प्रयत्न केला. त्यामुळे चोरट्याने त्याच्याकडील धारदार हत्याराने पती-पत्नीवर वार केले. परंतु जखमी अवस्थेत त्यांनी चोराला पकडण्याचा प्रयत्न करूनही अखेर चोरट्याने पळ काढला. चोरट्याच्या या हल्ल्यात पाटील दाम्पत्याच्या हातावर आणि डोक्यावर जखमा झाल्या आहेत. त्यांना उपचारासाठी नेरूळच्या शुश्रूषा रुग्णालयात दाखल करण्यात आले आहे. दरोड्याच्या घटनेवेळी पाटील यांचे दीड महिन्याचे बाळ देखील त्यांच्यासोबत घरामध्ये होते. सुदैवाने त्याला कसलीही दुखापत झालेली नाही. याप्रकरणी नेरूळ पोलीस ठाण्यात गुन्हा दाखल करण्यात आला आहे. चोरीसाठी घरात घुसलेल्या चोरट्याला पाटील दाम्पत्याने प्रतिकार केल्याने पळ काढावा लागला आहे. परंतु एक चोर घरात घुसला असताना त्याचे काही साथीदार घराबाहेर उभे होते असे काही स्थानिकांचे म्हणणे आहे. मात्र याप्रकरणी अधिक तपास सुरु असल्याचे सहाय्यक पोलीस निरीक्षक मंगेश पालांडे यांनी सांगितले. सशस्त्र दरोड्याच्या या प्रकारामुळे सारसोळे परिसरात दहशत निर्माण झाली आहे. (प्रतिनिधी)
सारसोळे येथे सशस्त्र दरोड्याचा प्रयत्न
By admin | Updated: January 10, 2015 01:49 IST