हापूससह कलिंगडची आवक वाढली; एपीएमसीमध्ये ३० हजार पेट्या दाखल

पाचही मार्केट सुरळीत सुरू

नवी मुंबई : मुंबई कृषी उत्पन्न बाजारसमितीमधील पाचही मार्केट सुरळीत सुरू झाली आहेत. फळ मार्केटमध्ये हापूससह कलिंगडची आवक वाढू लागली आहे. आंब्याची निर्यातही सुरू झाल्यामुळे शेतकऱ्यांना दिलासा मिळाला आहे.मंगळवारी फळ मार्केटमध्ये १८० ट्रक व टेंपोची आवक झाली आहे. रायगड, रत्नागिरी व सिंधुदुर्ग जिल्ह्यातून ३० हजार पेट्या हापूस विक्रीसाठी मार्केटमध्ये आला आहे. दक्षिणेकडील राज्यातून बदामी व इतर आंबाही विक्रीसाठी येत आहे.घाऊक मार्केटमध्ये २०० ते ५०० रूपये डझन व किरकोळ मार्केटमध्ये ४०० ते १ हजार रूपये डझन दराने हापूसची विक्री होत आहे. जवळपास ५० ट्रक व टेंपोमधून कलिंगड विक्रीसाठी आले आहे. रमजान सुरू होणार असल्यामुळे कलिंगडला मागणी वाढण्याची शक्यता आहे.भाजीपाला मार्केटमध्ये २५२ ट्रक व टेंपोची आवक झाली असून ३३२ वाहने मुंबईमध्ये थेट पाठविण्यात आली आहेत. कोबी, फ्लॉवर, शेवगा शेंग, टोमॅटोची आवक सर्वाधिक होत आहे. कांदा व बटाटा एपीएमसीच्या बाहेरही मोठ्याप्रमाणात उपलब्ध होत असल्यामुळे बाजारसमितीमध्ये ग्राहकांची संख्या रोडावली आहे.लिंबू, आल्याला पसंतीकोरोनाचा प्रादुर्भाव वाढल्यापासून लिंबू व आल्याला मागणी वाढली आहे. सध्या आल्याची ५० ते १०० टन प्रतिदिन विक्री होत आहे. २० ते २५ टन लिंबू विकले जात आहे. किरकोळ मार्केटमध्ये एक लिंबूचा दर पाच रुपये आहे.