नवी मुंबई : रेल्वे रुळालगतच्या झाडाला गळफास लावून तरुणाने आत्महत्या केल्याची घटना जुईनगर स्थानकालगत घडली आहे. मयत तरुणाच्या खिशातील उपचाराच्या चिठ्ठीवरून त्याची ओळख पटली तरी त्याच्या कुटुंबाविषयीची अधिक माहिती कळू शकलेली नाही, तर त्याने प्रकृतीच्या कारणावरून आत्महत्या केल्याचा पोलिसांचा प्राथमिक अंदाज आहे.हेमंत चव्हाण (३७) असे मयत तरुणाचे नाव आहे. बुधवारी सकाळी जुईनगर रेल्वेस्थानकापासून काही अंतरावर दोन रेल्वेमार्गामधील झाडाला लटकलेला त्याचा मृतदेह आढळून आला. घटनेची माहिती मिळताच नेरुळ पोलिसांनी घटनास्थळी धाव घेतली. मृतदेहाच्या अंगझडतीमध्ये पँटच्या खिशामध्ये उपचाराच्या चिठ्ठ्या तसेच डी. वाय. पाटील रुग्णालयाचे रुग्ण ओळखपत्र कार्ड आढळून आले. यावरून त्याच्या नावाची ओळख पटली आहे. शिवाय त्याच्यावर उपचार सुरू होते हे देखील पोलिसांना कळले आहे. त्यानुसार आजारपणाला कंटाळून त्याने आत्महत्या केली असावी अशी शक्यता नेरुळ पोलिसांनी वर्तवली आहे. मात्र त्याच्या कुटुंबाविषयीची अधिक माहिती पोलिसांना कळू शकलेली नाही. (प्रतिनिधी)
जुईनगर रेल्वे रुळालगत तरुणाची आत्महत्या
By admin | Updated: January 26, 2017 03:39 IST