पनवेल : सिडकोचे अध्यक्ष, आमदार प्रशांत ठाकूर यांनी शुक्रवारी नवीन पनवेलमधील विविध ठिकाणी भेटी घेत मान्सूनपूर्व कामांचा आढावा घेतला. नवीन पनवेलमधील आदई तलावाचा गणेश विसर्जन घाट, नवीन पनवेल सेक्टर ११ मधील उद्यानातील दुरुस्ती, रस्ते आणि गटारांची कामे पावसाळ्यापूर्वी पूर्ण करण्याच्या सूचना प्रशांत ठाकूर यांनी सिडको अधिकाऱ्यांना दिल्या.
सकाळी १० वाजल्यापासून प्रशांत ठाकूर यांनी सिडको हद्दीतील राजीव गांधी मैदान, शहीद तुषार चव्हाण उद्यान, रस्ते आणि गटारांच्या कामांची पाहणी केली. उद्यानातील पदपथ, स्वच्छतागृहाचे दरवाजे व इतर दुरुस्ती, नवीन पनवेल सेक्टर ११ मधील रस्ते आणि गटारांची दुरुस्ती पावसाळ्यापूर्वी करण्याचे आदेश अधिकाऱ्यांना दिले. या वेळी कविता चौतमोल, नगरसेवक संतोष शेट्टी, समीर ठाकूर, नगरसेविका राजश्री वावेकर, वृषाली वाघमारे आदी उपस्थित होते.