नारायण जाधव
नवी मुंबई : नवी मुंबईतीलबेलापूर-उलवे खाडीच्या परिसरात लवकरच फ्लोटेल अर्थात तरंगते फिरते हॉटेल उभारण्यात येणार आहे. महाराष्ट्र मेरी टाइम बोर्डाचा हा प्रकल्प असून, यामुळे मुंबई-नवी मुंबईतील पर्यटन विकासाला चालना मिळेल, असा विश्वास मेरी टाईम बोर्डाने व्यक्त केला आहे. सध्या हा प्रकल्प निविदास्तरावर आहे. या तरंगत्या फिरत्या हॉटेलसाठी अनुभवी आणि पात्र इच्छुक भागीदारांच्या शोधासाठी मेरी टाइम बोर्डाने स्वारस्य अभिकर्त्यांसाठी देकार मागविले असल्याचे सूत्रांनी सांगितले.
‘फ्लोटेल’ हे नाव ‘फ्लोट’ आणि ‘हॉटेल’ या शब्दांचे एकत्रीकरण आहे. असे हॉटेल असते जे नद्या, सरोवरे, बंदर आणि महासागरांत एकतर तरंगते असते किंवा फ्लोट म्हणजे त्या परिसरात पाण्यावर फिरणारे असते. कायमस्वरुपी नांगरलेली जहाजे किंवा विशिष्ट मार्गांवर ही हॉटेलरुपी जहाजे परिसरात फिरत असतात. अशी ही ‘फ्लोटेल’ सर्वप्रथम १९७० आणि ८० च्या दशकात चीन आणि हाँगकाँगमध्ये लोकप्रिय झाल्याने नंतर कालौघात ती जगभर पसरली.
यासाठी पर्यटकांची असते ‘फ्लोटेल’ला पसंती
नदी, सरोवर, खाडी, समुद्राच्या शांत परिसराचे ३६० डिग्री अंश दृश्यांसह फ्लोटेल्स बोटी किंवा जहाजांच्या आकारात ती आढतात. असेच 'फ्लोटेल' उभारण्यासाठी महाराष्ट्र मेरी टाइम बोर्डाने नवी मुंबईतील बेलापूर-उलवे खाडीची निवड केली आहे. मोकळे आकाश, शांत वाऱ्याच्या झुळूक आणि वाहत्या लाटांसोबत संगीताच्या स्वरांशी एकरूप होऊन दमादम मस्त कलंदर होण्यासाठी पर्यटकांची 'फ्लोटेल'ला पहिली पसंती असते. जगभरात सध्या ही 'फ्लोटेल' विविध आकार आणि आकारात येतात, ज्यामध्ये जर्मनीत काही ठिकाणी ८ ते १२ लोकांच्या बसण्याची क्षमता असते. तर गोव्याच्या फ्लोर दो मार्च येथे १५० लोकांसाठी बार्बी क्यू डोनट्स आहेत.
म्हणून केली नवी मुंबईची निवड
सागरी पर्यटनाला चालना देण्यासाठी नवी मुंबईत हे 'फ्लोटेल' उभारले जात आहे. कारण या परिसरात लवकरच आंतरराष्ट्रीय विमानतळ आकार घेत आहे. सी लिंकच्या उभारणीमुळे दक्षिण मुंबई आणि नवी मुंबई शहर एकदम जवळ येणार आहे. याच परिसरात जगप्रसिद्ध घारापुरी लेणींसह बेलापूर किल्ला, जेएनपीटी, गेटवे ऑफ इंडिया, रेवस मार्गे अलिबाग जोडले जाणार आहे. यामुळे ‘फ्लोटेल’ उभारण्यासाठी नवी मुंबईतील बेलापूर-उलवे खाडीची निवड केली आहे.
बेलापूर जेट्टीवरून पर्यटकांची ने-आण
बेलापूर-उलवे खाडीच्या परिसरातील नियोजित 'फ्लोटेल'वर पर्यटकांची ने-आण करण्यासाठी बेलापूर जेट्टीवरून केली जाणार आहे. या जेट्टीचा वापर लवकरच मुंबई-नवी मुंबईसह ठाणे-कल्याण-मीरा-भाईंदर-वसईपर्यंतच्या जलवाहतुकीसाठीही होणार आहे. यामुळे महामुंबईतील सर्वच शहरांतील पर्यटकांना नवी मुंबईतील या 'फ्लोटेल'चा लाभ घेणे सोपे होणार आहे.