नवी मुंबई : सानपाडा रेल्वे स्थानकामध्ये शुक्रवारी मद्यपीने राडा केला. चार प्रवाशांना मारहाण केली. महिला पोलीस कर्मचाऱ्यासही शिवीगाळ केली असून त्याच्याविरोधात वाशी रेल्वे पोलीस स्टेशनमध्ये गुन्हा दाखल केला आहे. उलवे येथे राहणारे सिद्धराम घोडके हे बेडरीडन रुग्णांची त्यांच्या घरी जावून सेवा करतात. शुक्रवारी सकाळी गोवंडीमधील रुग्णाची सेवा केल्यानंतर ते सानपाडाला जात होते. रेल्वे स्टेशनवर त्यांना एक प्रवाशाने धडक दिली.
दारू प्यायलेल्या त्या व्यक्तीने सिद्धाराम यांना मारहाण करण्यास सुरूवात केली. इतर प्रवाशांनी त्याला समजावण्याचा प्रयत्न केला असता त्यांनाही शिवीगाळ व मारहाण करण्यास सुरुवात केली. कर्तव्यावर असलेल्या रेल्वे प्रवाशाने त्याला समजावण्याचा प्रयत्न केला असता त्यांनाही शिवीगाळ करण्यास सुरूवात केली. तत्काळ जादा पोलिसांना बोलावून त्या व्यक्तीला ताब्यात घेतले. उत्तम बावदणे असे त्याचे नाव असून त्याची वैद्यकीय तपासणी केली असता त्याने मद्यपान केले असल्याचे निदर्शनास आले. त्याच्याकडे तिकीटही आढळून आले नाही.