माथेरानच्या डोंगरावर दरड कोसळली असल्याची घटना 25 जुलै रोजी घडली. याची माहिती तात्काळ प्रशासनाला दिल्यानंतर प्रशासन या ठिकाणी हजर झाले व सावधानता बाळगण्याच्या सूचना दिल्या. मुसळधार पाऊस कोसळत असल्याने माथेरानच्या मंकी पॉईंट च्या खालील माती दोन दिवसांपासून खाली कोसळत आहे. 25 जुलै रोजी सकाळपासून मोठा आवाज झाल्याने येथील ग्रामस्थ घाबरले, दरड कोसळण्याच्या आवाजाने येथील नागरिक सतर्क झाले, त्यांनी याची माहिती प्रशासनाला दिली.
यावेळी प्रांत अधिकारी, तहसीलदार, पोलीस अधिकारी, बीडिओ मंडळ अधिकारी, मनसेचे आपत्कालीन पथक घटनास्थळी हजर झाले. रात्रीची वेळ असल्याने नक्की काय प्रकार झाला आहे? हे पाहता आले नाही. मात्र, प्रशासन तात्काळ हजर झाल्याने त्यांनी नागरिकांना सतर्क राहण्याच्या सूचना दिल्या आहेत. काही दिवसांपूर्वी इर्शाळवाडी येथे झालेल्या दुर्घटनेमुळे नागरिक आणि प्रशासन सतर्क झाले आहे. कोणताही अनुचित प्रकार घडू नये, यासाठी नागरिक स्वतःची काळजी घेत आहेत. तसेच प्रशासन वारंवार सूचना देत आहेत.