अश्लील छायाचित्रांद्वारे ब्लॅकमेल करणाऱ्यास अटक

तरुणीला लग्नाचे आमिष दाखवून तिच्यावर अनेकदा बलात्कार करून तिची अश्लील छायाचित्रे काढून ब्लॅकमेल करणाऱ्या दोघांविरोधात काशिमीरा पोलिसांत गुन्हा दाखल

भार्इंदर : तरुणीला लग्नाचे आमिष दाखवून तिच्यावर अनेकदा बलात्कार करून तिची अश्लील छायाचित्रे काढून ब्लॅकमेल करणाऱ्या दोघांविरोधात काशिमीरा पोलिसांत गुन्हा दाखल झाल्यानंतर पोलिसांनी ब्लॅकमेल करणाऱ्यांपैकी एकास अटक केली आहे. तर बलात्काऱ्यास मात्र अटकपूर्व जामीन मिळाल्याने सध्या तो मोकाट फिरत आहे. तर अन्य एक तिसरा आरोपी फरार आहे़पोलिसांनी दिलेल्या माहितीनुसार बलात्कारी शानू खान, रा. मुंबई हा फिश टँक देखभालीसाठी येथील एका २६ वर्षीय तरुणीच्या घरी येत होता. काही कालावधीनंतर त्या दोघांत प्रेमाचे सूत जुळले. त्याने आपण अविवाहित असून त्या तरुणीला लग्नाचे आमिष दाखवून अनेकदा तिच्यावर लॉज व फराज वारीस या मित्राच्या घरी बलात्कार केला. या शरीरसंबंधाचे फराज व त्याच्या अन्य एका मित्राने अश्लील छायाचित्रे काढली होती. तरुणीने शानूकडे लग्नाचा तगादा लावल्यानंतर त्याने टाळाटाळ करण्यास सुरुवात केली. दरम्यान, तो विवाहित असल्याची माहिती त्या तरुणीला मिळाल्याने त्याचा मित्र फराज व त्याच्या अन्य मित्राने तिला अश्लील छायाचित्रे इंटरनेटवर टाकण्याची धमकी देण्यास सुरुवात केली. त्याबदल्यात त्या दोघांनी तिच्याकडे सुरुवातीला ५० व नंतर २५ हजार रु. मागणी केली. अखेर पीडित तरुणीने वैतागून काशिमीरा पोलिसांत बलात्कार व ब्लॅकमेलची तक्रार नोंद केली. पोलिसांनी त्वरित फराजला गजाआड केले असून सध्या त्याची रवानगी न्यायालयीन कोठडीत करण्यात आली आहे. त्याची कुणकुण लागलेल्या शानूने मात्र न्यायालयातून अटकपूर्व जामीन मिळविला आहे. यातील तिसरा आरोपी फरार झाला असून पोलीस त्याचा शोध घेत आहेत. (प्रतिनिधी)