चाकूचा धाक दाखवत ५० हजार लुटले

मीरा रोड : मीरा रोडच्या नयानगरमध्ये एका सराफाच्या दुकानात दोघा तरुणांनी शिरून चाकूचा धाक दाखवत ५० हजारांची रक्कम लुटली. सराफाने प्रतिकार करण्याचा प्रयत्न केला असता त्याच्या डोक्यात वार करून जखमी केले. आजूबाजूच्या दुकानदारांनी हिमतीने एका लुटारूला पकडून पोलिसांच्या ताब्यात दिले.नयानगरमध्ये अस्मिता सुपर मार्केटसमोर राजू गोल्ड नावाचे सोनेचांदीचे दुकान आहे. शनिवारी दुकानमालक सिद्धार्थ जैन हे वडील गावी गेले असल्याने एकटेच होते. दुपारी पावणेदोनच्या सुमारास दुकानातून दोघेजण शिरले व शटर बंद केले. एकाने चाकूचा धाक दाखवत ५० हजारांची रक्कम काढून घेतली. जैन यांनी प्रतिकार केला असता दुसऱ्याने हातातील मोठा पाना डोक्यात मारून त्यांना जखमी केले.जैन यांच्या दुकानाचे शटर बंद झाल्याचे व आतून आवाज येत असल्याचे कळताच शेजारी दुकानदार तन्वीर कुरेशी व मोहसीन कुरेशी, भागाराम चौधरी, अमजद यांनी मदतीसाठी धाव घेत दुकानाचे शटर उघडले. तोच चाकू हातात असलेला एक लुटारू रक्कम घेऊन पळून गेला. त्याच्या साथीदारास मात्र त्या दुकानदारांनी धाडसाने पकडले. गस्त घालत असलेले नयानगर पोलीसही घटनास्थळी पोहोचले व आरोपीला ताब्यात घेतले.अटक केलेला आरोपी मुस्तफा मकबूल चौहान (१९) हा एसी दुरुस्तीचे पूर्वी काम करायचा. त्याचा साथीदार साहिल मकबूल मुन्शी याचा नयानगर पोलीस शोध घेत आहेत.