योगाने संपूर्ण जगाला भारताबरोबर जोडले - पंतप्रधान मोदी

भारताबाहेर योगासने प्रचंड लोकप्रिय असून योगासनांमुळे संपूर्ण जग भारताबरोबर जोडले जात आहे.

 ऑनलाइन लोकमत

लखनऊ, दि. 21 - आज योगा अनेकांच्या आयुष्याचा अविभाज्य भाग बनला आहे. भारताबाहेर योगासने प्रचंड लोकप्रिय असून योगासनांमुळे संपूर्ण जग भारताबरोबर जोडले जात आहे. मागच्या तीनवर्षात अनेक नव्या योगा संस्था आकाराला आल्याचा आनंद आहे. योग शिक्षकांची मागणी वाढत चालली आहे अशा शब्दात पंतप्रधान नरेंद्र मोदींनी योगासनांचे महत्व विषद केले. ते तिस-या आंतरराष्ट्रीय योगदिनाच्या निमित्ताने लखनऊमध्ये बोलत होते. 

 

पंतप्रधान मोदी यंदा लखनऊमध्ये योग दिवस साजरा करत असून, उपस्थितांना मार्गदर्शन केल्यानंतर मोदीं स्वत: योगासने करत आहेत. फक्त शारीरीक तंदुरुस्ती नव्हे निरोगी शरीस्वास्थय महत्वाचे आहे. योगामुळे आरोग्याची खात्री मिळते. योगासने करण्यासाठी जास्त खर्चही करावा लागत नाही. जेवणामध्ये जसे मीठ लागते तसेच योगाला आपल्या आयुष्याचा एक भाग बनवा असे आवाहन मोदींनी केले. 

 

 

देशभरात योग दिवस साजरा करणा-या सर्वांना मोदींनी यावेळी शुभेच्छा दिल्या. मुसळधार पाऊस कोसळल्यानंतरही मोठया संख्येने उपस्थित राहून योगदिन साजरा करण्याचा उत्साह दाखवल्याबद्दल पंतप्रधान मोदींनी उपस्थितांचे आभार मानले. उत्तरप्रदेशचे मुख्यमंत्री योगी आदित्यनाथ, राज्यपाल राम नाईकही योग दिनाला उपस्थित आहेत. योगा शरीर, मन आणि आत्म्याला एकत्र आणते. आज भाषिक आणि सांस्कृतिक रेषा ओलांडून संपूर्ण जग योगामुळे एकत्र येत आहे. आज जगातील अनेक देशांना आपली भाषा, परंपरा, संस्कृती माहित नाही पण ते सर्व देश योगाच्या माध्यमातून आपल्याशी जोडले जात आहेत असे मोदी म्हणाले. आधी योगासने हिमालयातील साधूपर्यंत मर्यादीत होती पण आता ती सर्व सामान्यांच्या आयुष्याचा भाग बनली आहेत असे मोदी म्हणाले. 24 तास योगासने करण्याची आवश्यकता नाही. 50 ते 60 मिनिटे योगासने केली तरी, भरपूर आहे. 125 कोटी भारतीय आणि जगभरातील लोकांनी नियमित योगासने सुरु केली तर, मानवी विचारातून ज्या समस्या उदभवतात त्यावर मात करता येईल असे मोदी म्हणाले. मीठाचे उदहारण देऊन मोदींनी योगाचे महत्व विषद केले. मीठ जेवणात फक्त चवीसाठी नाही तर शरीर स्वास्थासाठी आवश्यक असते तसेच मीठा इतकेच योगा आयुष्यात महत्वाचे असल्याचे मोदींनी सांगितले.  

 

 

लखनऊच्या रमाबाई आंबेडकर मैदानावर हा कार्यक्रम होत आहे. आंबेडकर मैदानावरील या योग कार्यक्रमामध्ये 50 हजार नागरीक सहभागी झाले आहेत. योगाच्या माध्यमातून भारत नवी उंची गाठू शकतो असे मत उत्तरप्रदेशचे मुख्यमंत्री योगी आदित्यनाथ म्हणाले. 

 

PM Narendra Modi leads #InternationalYogaDay celebrations in Lucknow pic.twitter.com/JCzAGfwNQf— ANI UP (@ANINewsUP) June 21, 2017