गाझियाबाद: दिल्लीच्या लागून असलेल्या उत्तर प्रदेशातील गाझियाबाद जिल्ह्यात एक अतिशय धक्कादायक घटना घडली. क्रॉसिंग रिपब्लिकच्या सेवियर सोसायटीतील एक महिला अचानक नवव्या मजल्यावरून खाली पडली. तिची प्रकृती गंभीर असून सध्या तिच्यावर जवळच्या रुग्णालयात उपचार सुरू आहेत. पती-पत्नीमध्ये भांडण झाल्यानंतर हा प्रकार घडल्याचं बोललं जात आहे.
पती-पत्नीमध्ये भांडण झाल्यानंतर पत्नी बाल्कनीत गेली. वाद विकोपाला गेल्यानं ती बाल्कनीतून उडी मारेन असं म्हणत होती. तितक्यात ती घसरली आणि अंगावर काटा आणणारा भयानक प्रकार घडला. सध्या पोलीस या घटनेचा तपास करत आहेत. उपलब्ध माहितीनुसार, क्रॉसिंग रिपल्बिकच्या सेवियर सोसायटीत नवव्या मजल्यावर वास्तव्यास असलेल्या पती-पत्नीचं भांडण झालं. वाद टोकाला गेल्यानं पत्नी बाल्कनीत आली.
बाल्कनीत आलेली पत्नी खाली उडी मारण्याची भाषा करत असल्याची माहिती पोलिसांच्या प्राथमिक तपासातून पुढे आली आहे. तितक्यात तिचा तोल गेला आणि ती खाली पडली. पत्नीचा तोल जाताच पती पुढे सरसावला. त्यानं तिचा हात पकडला. मात्र तो फार वेळ तिला पकडून ठेऊ शकला नाही. काही वेळातच हात सुटल्यानं महिला खाली कोसळली. तिची प्रकृती गंभीर आहे. जवळच्या रुग्णालयात तिच्यावर उपचार सुरू आहेत. पोलीस या प्रकरणाचा अधिक तपास करत आहेत.