नवी दिल्ली : यूजीसी- नॅशनल इलिजिबिलिटी टेस्ट (नेट) ही बुधवारी १५ जानेवारीला होणारी परीक्षा मकर संक्रांत व पोंगल या सणांमुळे पुढे ढकलण्यात आल्याची घोषणा नॅशनल टेस्टिंग एजन्सीने (एनटीए) सोमवारी केली.
पीएचडी, ज्युनिअर रिसर्च फेलोशिप मिळविण्यासाठी आणि सहायक प्राध्यापक म्हणून नियुक्तीकरिता यूजीसी-नेट परीक्षा घेण्यात येते. ८५ विषयांसाठी संगणकाधारित पद्धतीने ही परीक्षा ३ जानेवारीपासून घेेण्यास सुरुवात झाली व ही प्रक्रिया १६ जानेवारीपर्यंत चालणार आहे.
मात्र, १५ जानेवारीला होणारी परीक्षा मकर संक्रांती व पोंगल या सणांमुळे पुढे ढकलावी, अशी मागणी विविध संघटनांनी केली होती. त्यामुळे विद्यार्थ्यांचे हित लक्षात घेऊन यूजीसी-नेट परीक्षा पुढे ढकलण्यात आली.