ऑनलाइन लोकमत
चंदीगड, दि. २८ - हरियाणाचे आरोग्य व क्रीडामंत्री अनिल विज यांनी बाहेर जाण्याचा दिलेला आदेश मानण्यास नकार देणा-या महिला पोलिस अधिकारी संगीता कालिया यांची बदली करण्यात आली आहे.
शुक्रवारी झालेल्या जनतक्रार निवारण समितीच्या बैठकीचे अनिल विज हे अध्यक्षपद भूषवत होते. त्यावेळी इतर अधिका-यांसह संगीता कालिया या महिला पोलिस अधिकारीही उपस्थित होत्या. पंजाबमधील सीमा भागात होत असलेल्या दारुची तस्करी थांबवण्याबाबत पोलिसांची भूमिका काय असा प्रश्न विज यांनी उपस्थित केला. त्यावर पोलीस कारवाई करत असून आत्तापर्यंत अडीच हजार गुन्हे दाखल झाले, मात्र त्यापैकी बरेच आरोपी जामीनवर सुटले असल्याचे संगीता यांनी सांगितले. मात्र संगीता यांच्या उत्तराने विज यांचे समाधान न झाल्याने त्यांनी संगिता यांना 'गेट आऊट‘ असे म्हटले. मात्र आपली चूक नसल्याने संगीता यांनी बाहेर जाण्यास स्पष्ट नकार दिला. त्यामुळे संतापलेले विज स्वत:च बैठकीतून बाहेर पडले. जोपर्यंत कालिया फतेहाबादला आहेत तोपर्यंत मी तेथे जाणार नाही‘ असा इशाराही विज यांनी दिला. त्यानंतर आज (शनिवार) कालिया यांची बदली करण्यात आली.