ऑनलाइन लोकमत
कोलकत्ता, दि. 14 - जीवाला धोका आहे हे माहित असूनही अनेकांना साहसी सेल्फी काढण्याचा मोफ आवरता येत नाही. अनेकदा अशा सेल्फीच्या नादात दुर्देवी घटना घडतात. गुरुवारी संध्याकाळी असाच धावत्या ट्रेनमधून साहसी सेल्फी काढण्याच्या नादात चौघांचा मृत्यू झाला. पश्चिमबंगलाच्या हावडा परिसरात ही दुर्देवी घटना घडली.
तारकनाथ माकाल हा युवक आपल्या चार मित्रांसोबत ट्रेनमधून प्रवास करत होता. यावेळी तारकनाथला ट्रेनच्या दरवाजावर लटकून साहसी सेल्फी काढण्याचा मोह झाला. ट्रेनच्या दरवाजावर लटकून असा सेल्फी काढण्याचा प्रयत्न करत असताना तारकनाथ ट्रेनमधून खाली पडला. त्याला वाचवण्यासाठी त्याच्यासोबतच्या मित्रांनी ट्रेनमधून उडी मारली. मात्र त्याचवेळी विरुद्ध दिशेने येणा-या ट्रेनखाली येऊन चौघांचा मृत्यू झाला.
सुमित कुमार, संजीव पॉली, काजल सहा आणि चंदन पॉली या चौघांचा मृत्यू झाला. तारकनाथला रुग्णालयात दाखल करण्यात आले असून त्याची प्रकृती गंभीर आहे. लीलउह आणि बीलुर रेल्वे स्टेशन दरम्यान ही घटना घडली. तारकेश्वर येथील मंदिरात दर्शन घेऊन हे पाचही मित्र घरी परतत होते. दुर्घटना घडली त्यावेळी डब्ब्यामध्ये गर्दी नव्हती. तारकनाथ सेल्फी काढण्यासाठी दरवाजावर लटकत होता अशी माहिती पोलिसांनी दिली.