भोपाळ: मध्यप्रदेशातील शिवराज सरकार विकासाच्या मोठ्या गोष्टी करताना दिसते. पण, दुसरीकडे गरिबांना मृत्यूनंतरही मोठे हाल सहन करावे लागतात. मध्य प्रदेशातील शहडोल येथील वैद्यकीय महाविद्यालयातून एक ह्रदय हेलावून टाकणारी घटना समोर आली आहे. महिलेच्या मृत्यूनंतर मृतदेहाला नेण्यासाठी वाहन न मिळाल्याने मुलाने चक्क मोटारसायकलवरुन मृतदेह नेल्याची घटना घडली आहे. या घटनेचा व्हिडिओ टीव्ही-9 हिंदीने शेअर केला आहे.
महिलेच्या मृत्यूनंतर मृतदेह गावाकडे नेण्यासाठी मुलाने शासकीय रुग्णवाहिका मिळवण्याचा प्रयत्न केला. पण, शासकीय रुग्णवाहिका मिळाली नाही, यानंतर खासगी वाहनाने मृतदेह नेण्याचे ठरले. खासगी वाहन चालकाने 5 हजार रुपयांची मागणी केली, मुलाकडे पैसे नव्हते. अखेर त्याने आईचा मृतदेह मोटारसायकलवर बांधला आणि 80 किलोमीटरचा प्रवास करुन गावी आला.