मुंबई : समाजवादी पार्टीचे आमदार अबू आझमी यांच्याशी आपले संबंध असल्याची जबानी इंडियन मुजाहिदीन या दहशतवादी संघटनेचा सदस्य सुलतान अहमद फैझान याने दिल्याने आपल्या वादग्रस्त वक्तव्यांनी नेहमी चर्चेत राहणारे अबू आझमी अडचणीत येण्याची शक्यता आहे. फैझान याला दोन महिन्यांपूर्वी दुबईत अटक करून दिल्लीत आणण्यात आले होते.सुरक्षा यंत्रणांनी फैझानच्या भारतातील काही नेत्यांशी असलेल्या संबंधांबाबत चौकशी केली असता १९८0 साली स्थापन केलेल्या प्लेसमेंट एजन्सीमध्ये अबू आझमी आपला सहकारी असल्याचे फैझानने पोलिसांना सांगितले आहे. नोकरीसाठी भारतातून दुबईमध्ये कामगार पाठवण्याचे काम या एजन्सीमार्फत केले जात होते.फैझान मूळचा उत्तर प्रदेशमधील आझमगडचा रहिवासी असून, अंडरवर्ल्ड डॉन अबू सालेम आणि अबू आझमी हे देखील आझमगडचेच राहणारे आहेत. त्यामुळे फैझानचे अबू सालेम आणि अबू आझमी या दोघांसोबत जवळचे संबंध होते. २00८ साली दिल्लीत झालेल्या साखळी स्फोटांमागे पाकिस्तानमधील सूत्रधारांच्या संपर्कात राहणार्‍या फैझानचा हात होता. तसेच फैझान इंडियन मुजाहिदीनच्या दहशतवाद्यांना आसरा देण्याचे तसेच या संघटनेला आर्थिक पाठबळ देण्याचे काम करीत होता, असा पोलिसांचा आरोप आहे.
अबू आझमींसोबत दहशतवाद्याचे संबंध
By admin | Updated: May 6, 2014 15:41 IST