जादू टोण्यातून सहा लाखांची फसवणूक

एका महिलेला अटक : अंनिसच्या मदतीने पोलिसांची कारवाई
नातेपुते : नातेपुते-दहिगाव रस्त्यावरील 44 फाटा येथील सुनीता उर्फ ताई रमेश विटकर या महिलेने जादूटोणा व बुवाबाजी करून पाच ते सहा लाखांची फसवणूक केली. याबाबत वसंत तात्याबा माने (रा. कोथळे, ता. माळशिरस) यांनी नातेपुते पोलीस ठाण्यात तक्रार दिली आहे. पोलिसांनी अंधर्शद्धा निर्मूलन समितीच्या मदतीने सुनीता विटकर या महिलेस अटक केली आहे.
फिर्यादी वसंत तात्याबा माने यांचा माल वाहतुकीचा व्यवसाय आहे. काही दिवसांपूर्वी त्यांचा मुंबई येथे रेल्वे प्रवासात स्टेशनवर उतरत असताना तोल जाऊन अपघात झाला होता. डाव्या पायाला दुखापत झाली होती. त्यांच्यावर प्राथमिक उपचार केल्यानंतर पुढील उपचार कोल्हापूर येथे चालू होते. यादरम्यान नातेपुते येथे एक महिला असून ती पितरे, चेटूक, भूतबाधा काढते असे समजले. कोल्हापूर येथून डिस्चार्ज दिल्यानंतर नातेवाईक नातेपुते येथील सुनीता विटकर यांच्याकडे घेऊन गेले. वसंत माने यांना मधुमेहाचा त्रास असल्याने व तिने केलेल्या अघोरी कृत्यामुळे जखमा आणखी गंभीर बनल्या. फसवणुकीबद्दल वसंत माने यांनी नातेपुते पोलिसात फिर्याद दिली असून, पोलिसांनी या महिलेस अटक करून जादूटोणा अंतर्गत गुन्हा दाखल केला आहे. अधिक तपास सहायक पोलीस निरीक्षक दत्तात्रय खाडे, ठाणे अंमलदार शशिकांत आळणे, पो. हे. कॉ. गडदे, चंद्रकांत सूळ, पो. हे. कॉँ. नीता शेळके करीत आहेत.
करणीच्या बाधेची बतावणी
सुनीता विटकर हिने वसंत माने यांना शारीरिक त्रास नसून करणीची बाधा असल्याचे सांगून दूध, दही, झाडाची पाने, अंगारा टाकून त्यांना अंघोळ घातली व जखम त्याच पाण्याने धुतली. देवीची जत्रा करण्यास भाग पाडून 40 हजार रुपयांप्रमाणे आठ ते दहा जत्राही केल्या. यामध्ये 5-6 लाख रुपये खर्च झाले. तरी काहीही फरक पडला नाही.