रामटेक... चोरी

रामटेक परिसरात चोरीचे सत्र सुरूच
पोलिसांचे दुर्लक्ष : नागरिकांत भीतीचे वातावरण
रामटेक : स्थानिक पोलीस ठाण्याच्या हद्दीत दिवसेंदिवस चोरी व घरफोडीच्या घटनांमध्ये मोठी वाढ होत आहे. अशा गुन्ह्याचा तपास लावण्यात पोलीस यंत्रणा अपयशी ठरत आहे. सध्या कडाक्याची थंडी सुरू आहे, अशात बाहेरगावी गेल्यास घरी हमखास चोरी होत असल्याने परिसरातील नागरिकांत भीतीचे वातावरण आहे. शहरासह परिसरातील शीतलवाडी, गुरूकुलनगर व इतर वस्त्यांमध्ये नागरिक चोरट्यांच्या दशतीत असून याकडे रामटेक पोलीस दुर्लक्ष करीत असल्याचा आरोप नागरिकांनी केला आहे.
स्थानिक रहिवासी दयानंद रेवतकर यांच्याकडे तीनदा घरफोडी झाली. तसेच त्यांच्या सिमेंट फॅक्टरी आवारातून १६ लाख रुपयांचा मुद्देमाल चोरट्यांनी लंपास केला. शीतलवाडी येथील व्यवसायी प्रकाश कळमकर यांच्या घरी चोरट्यांनी डोळ्यात मिरची पावडर टाकून ५ लाख ८५ हजार रुपयांची रोख रक्कम पळविली. तसेच वैशालीनगरातील लता पाठक यांच्याकडील दीड लाखाचा ऐवज चोरून नेला. त्यानंतर शहरातील नवीन वसाहतीमध्ये दर आठवड्याला चोरीच्या घटना होत आहेत. मोटरसायकल चोरी, आठवडी बाजारात मंगळसूत्र चोरी, शेतातील कृषीपंपाची चोरी आदी घटनांमुळे नागरिक दहशतीत जगत आहेत.
तालुक्याचे ठिकाण असलेल्या रामटेक शहरात दर रविवारी आठवडी बाजार भरतो. तालुक्यातील खेड्यापाड्यातील महिला व ग्रामस्थ बाजारासाठी येतात. बाजारातील ग्राहकांमध्ये मजुरांचा मोठ्या प्रमाणात समावेश असतो. मोलमजुरी करून कुटुंबाचा गाडा हाकणाऱ्या मजुरांवर बाजारात खिसेकापू डाव साधतात. येथील आठवडी बाजारात खिसेकापूचे प्रमाण अधिक असते. या घटनांकडे पोलीस कानाडोळा करीत असल्याने चोरीचे प्रमाण दिवसेंदिवस वाढतच आहे. तसेच मोबाईल चोरीचेही प्रमाण वाढत आहे.