नवी दिल्ली - काँग्रेसचे नेते राहुल गांधी सध्या नेपाळच्या खासगी दौऱ्यावर आहेत. मिळत असलेल्या माहितीनुसार ते त्यांची नेपाळी मैत्रिण सुमनिमा उदास यांच्या विवाह सोहळ्यात सहभागी होण्यासाठी काठमांडू येथे गेले आहेत. या दरम्यान, राहुल गांधी यांच्या नेपाळ दौऱ्याचा एक व्हिडीओ व्हायरल झाला आहे. या व्हिडीओमध्ये राहुल गांधी एका नाईट क्लबमध्ये गेलेले दिसत आहेत.
काठामांडू पोस्टने दिलेल्या वृत्तानुसार राहुल गांधी सोमवारी काठमांडू विमानतळावर पोहोचले. त्यानंतर ते तीन सहकाऱ्यांसह मेरिएट हॉटेलमध्ये थांबले. राहुल गांधी त्यांची मैत्रिण सुमनिमा उदाय हिच्या विवाह सोहळ्यासाठी पोहोचले आहेत.
याबाबत सुमनिमाचे वडील आणि म्यानमारमध्ये नेपाळचे राजदूत भीम उदास यांनी सांगितले की, आम्ही राहुल गांधी यांना माझ्या मुलीच्या लग्नाचे निमंत्रण दिले होते. हा विवाह सोहळा मंगळवारी होणार आहे, तर ५ मे रोजी रिसेप्शन होणार आहे. सुमनिमा यांचा विवाह नीमा मार्टिन शेरपा यांच्यासोबत होणार आहे. रिपोर्टनुसार भारतातील अनेक व्हीआयपी मंडळीही या विवाह सोहळ्यासाठी नेपाळमध्ये दाखल झाली आहे.
सुमनिमा उदास यांनी अमेरिकेच्या Lee विद्यापीठामधून पत्रकारिता आणि ऑक्सफर्ड युनिव्हर्सिटीमधून मास्टर डिग्री घेतली आहे. तिने सीएनएन इंटरनॅशनलमध्ये वार्ताहार म्हणून काम केले आहे. त्यांनी राजकारण, आर्थिक, सामाजिक, पर्यावरण आणि इतर मुद्द्यांचे वार्तांकन केले आहे. दिल्लीतील बलात्कार प्रकरणाचंही त्यांनी वार्तांकन केलं होतं.