ऑनलाइन लोकमत
मुंबई, दि. २५ - अंडरवर्ल्ड डॉन छोटा शकीलच्या मुलीच्या लग्नाच्या रिसेप्शन सोहळ्यावर मुंबई पोलिसांची करडी नजर आहे. या रिसेप्शन सोहळ्यासाठी बॉलीवूडमधील काही जणांना निमंत्रण देण्यात आल्याचे सूत्रांचे म्हणणे असून दुबई व अरब देशांमध्ये दौ-यावर जाणा-या सेलिब्रीटींवर पोलिसांची नजर असणार आहे.
छोटा शकीलच्या मुलीचे १९ सप्टेंबर रोजी पाकिस्तानमध्ये लग्न झाले आहे. शकीलची मुलगी व्यवसायाने डॉक्टर असून तिचा पतीही डॉक्टरच आहे. छोटा शकीलचा जावई मुळचा भारतीय असला तरी सध्या तो लंडनमध्ये राहतो. मुलीच्या लग्नानिमित्त छोटा शकीलने दुबईमध्ये रिसेप्शन सोहळा ठेवला आहे. याविषयी अद्याप अधिकृत घोषणा झालेली नाही. हा सोहळा अरब देशांमधील कुठल्याही शहरात होऊ शकतो असे सूत्रांचे म्हणणे आहे. एका वृत्तपत्राने दिलेल्या वृत्तानुसार मुंबई पोलिस या रिसेप्शन सोहळ्याकडे गांभीर्याने बघत आहेत. या सोहळ्यासाठी बॉलीवूडमधील काही मंडळींना निमंत्रण देण्यात आल्याची माहिती मुंबई पोलिसांना मिळाली आहे. त्यामुळे या मंडळींच्या दुबई व अरब देशांमधील दौ-यावर पोलिस नजर ठेवणार आहेत. बॉलीवूडमधील सेलिब्रीटी भारतातून थेट छोटा शकीलने आयोजित केलेल्या रिसेप्शन सोहळ्याला जाणार नाहीत. मात्र ते अन्य देशांमधून छोटा शकीलच्या रिसेप्शन सोहळ्याला उपस्थित राहू शकतील अशी शक्यता एका वरिष्ठ पोलिस अधिका-याने वर्तवली आहे. मात्र छोटा शकीलने नेमके कोणाकोणाला निमंत्रित केले आहे याचा तपशील जाहीर करण्यास पोलिसांनी नकार दिला आहे.
डॉनची मुलं हुशार
छोटा शकील, छोटा राजन यांनी अंडरवर्ल्डमध्ये दहशतीच्या जोरावर नाव कमावले असले तरी त्यांची मुलं मात्र अंडरवर्ल्डपासून चार हात लांब असल्याचे दिसून येते. नुकतीच विवाहबद्ध झालेली छोटा शकीलची मुलगी डॉक्टर आहे. तर छोटा राजनची मुलगीही सध्या परदेशात उच्च शिक्षण घेत असल्याचे सूत्रांनी सांगितले.