जॉर्डन, इथिओपिया आणि ओमान..., पंतप्रधान मोदी तीन देशांना भेट देणार; या मुद्द्यांवर केंद्रित करणार लक्ष

पंतप्रधान नरेंद्र मोदी १५ ते १८ डिसेंबर दरम्यान जॉर्डन, इथिओपिया आणि ओमान या तीन देशांच्या दौऱ्यावर जाणार आहेत.

PM Modi Visit: बदलत्या जागतिक आणि प्रादेशिक राजनैतिक समीकरणांच्या पार्श्वभूमीवर भारत आपले पश्चिम आशिया आणि आफ्रिकेतील संबंध अधिक दृढ करण्यासाठी मोठी कूटनीतिक मोहीम हाती घेत आहे. पंतप्रधान नरेंद्र मोदी हे १५ ते १८ डिसेंबर २०२५ दरम्यान जॉर्डन, इथियोपिया आणि ओमान या तीन महत्त्वाच्या देशांच्या दौऱ्यावर रवाना होणार आहेत. ही यात्रा भारत आणि या भागीदार देशांमधील संबंधांना नवी दिशा देणारी ठरणार आहे, तसेच तीन खंडांमध्ये भारताची राजनैतिक उपस्थिती अधिक प्रभावी करेल.

द्विपक्षीय संबंध मजबूत करण्यावर लक्ष

पंतप्रधान मोदींच्या या दौऱ्याचा मुख्य उद्देश द्विपक्षीय संबंधांना बळकट करणे, महत्त्वपूर्ण राजनैतिक वर्धापन दिनांचा सोहळा साजरा करणे आणि व्यापार, ऊर्जा, सुरक्षा, तंत्रज्ञान, कृषी आणि क्षेत्रीय स्थैर्य यांसारख्या मुद्द्यांवर सहकार्य वाढवणे हा आहे. पंतप्रधान मोदी प्रत्येक देशातील नेतृत्वाशी भेट घेऊन सामायिक आव्हाने, आर्थिक भागीदारी आणि धोरणात्मक सहकार्यावर चर्चा करतील.

जॉर्डन: ७५ वर्षांच्या मैत्रीचा टप्पा

दौऱ्याच्या पहिल्या टप्प्यात, १५ ते १६ डिसेंबर रोजी पंतप्रधान मोदी जॉर्डनचे राजे अब्दुल्ला द्वितीय बिन अल हुसेन यांच्या निमंत्रणावरून जॉर्डनला भेट देतील.

या भेटीत दोन्ही नेते भारत-जॉर्डन संबंधांचा सर्वंकष आढावा घेतील आणि पश्चिम आशियातील प्रादेशिक स्थितीवर विचारमंथन करतील. यावर्षी भारत-जॉर्डन राजनैतिक संबंधांना ७५ वर्षे पूर्ण होत आहेत. हा दौरा संरक्षण सहकार्य, तंत्रज्ञान भागीदारी, आर्थिक गुंतवणूक आणि शांतता प्रस्थापित करण्याच्या भूमिकेवर नवीन संधी शोधण्यास मदत करेल.

इथियोपिया: आफ्रिकेतील भागीदारी वाढवणार

१६ ते १७ डिसेंबरदरम्यान पंतप्रधान मोदी इथियोपियाचे पंतप्रधान अबी अहमद अली यांच्या निमंत्रणावरून इथियोपियाला भेट देतील. पंतप्रधान मोदींचा हा पहिला इथियोपिया दौरा असेल. दोन्ही देश ग्लोबल साउथचे महत्त्वाचे भागीदार आहेत. हवामान बदल, अन्न सुरक्षा, कृषी, डिजिटल सार्वजनिक पायाभूत सुविधा आणि आर्थिक विकास यांसारख्या महत्त्वाच्या क्षेत्रांवर सहकार्य मजबूत करण्यावर चर्चा होईल. या दौऱ्यामुळे संरक्षण, उत्पादन, ऊर्जा आणि ब्रिक्स समूहाचा विस्तार यांसारख्या क्षेत्रांत नवी भागीदारी निर्माण होण्याची शक्यता आहे.

ओमान: ७० वर्षांची धोरणात्मक भागीदार

दौऱ्याच्या अंतिम टप्प्यात, १७ ते १८ डिसेंबर रोजी पंतप्रधान मोदी ओमानचे सुलतान हाइथम बिन तारिक यांच्या निमंत्रणावरून ओमानला भेट देतील. पंतप्रधान मोदींचा हा ओमानचा दुसरा दौरा आहे. ही भेट दोन्ही देशांमधील ७० वर्षांच्या राजनैतिक भागीदारीचे प्रतीक आहे. ओमानसोबत व्यापार, गुंतवणूक, ऊर्जा सुरक्षा, संरक्षण, सागरी सहकार्य आणि सांस्कृतिक संबंधांवर विस्तृत चर्चा होईल. भारत आणि ओमानचे ऐतिहासिक संबंध हिंदी महासागर क्षेत्रातील सुरक्षा आणि आर्थिक भागीदारीत महत्त्वपूर्ण भूमिका बजावतात.

दरम्यान, हा दौरा मध्य पूर्व आणि आफ्रिकेत भारताच्या कूटनीतिक अजेंड्याला गती देणारा ठरेल, असा विश्वास पंतप्रधान कार्यालयाने व्यक्त केला आहे.